Kosova zgjedh 10 kryetarë bashkie në turnin e parë. Probleme në Mitrovicë
Ipeshkvi i Kosovës, imzot Dodë Gjergji, pati folur për përgjegjësinë e secilit në
zgjedhjet e djeshme lokale, u pati kujtuar të gjithë shtetasve se pjesëmarrja në votime
është detyrim moral, i pati këshilluar të zgjedhin njerëzit më të mirë e t’i ndihmojnë
të zgjedhurit, edhe kur nuk ua kanë dhënë votën. “Ata që fitojnë besimin e shumicës
– shkruante ipeshkvi i Kosovës – kanë përgjegjësi të investojnë të gjitha aftësitë
dhe mundësitë e tyre për të qeverisur mirë, për t’i motivuar njerëzit dhe për të vënë
në dispozicion mjete të mjaftueshme që e qytetërojnë bashkësinë politike. Nga ata
kërkohet të krijojnë lehtësi administrative që qytetari… të realizojë ëndrrën e tij
të shpresës”. Synonte, imzot Dodë Gjergji, t’u shpjegonte kandidatëve për kryetarë
bashkie se pas zgjedhjes, duhet të punojnë për të gjithë e jo vetëm për ata, që u
kanë dhënë votën. Zgjedhjet e djeshme, pra, duhej të ishin provë bashkëjetese
ndërmjet serbëve e shqiptarëve të Kosovës, por në veri të vendit, ngjarjet morën tatëpjetën.
Pjesa serbe, tradicionalisht për bojkotimin e zgjedhjeve, shkaktoi probleme në qendrat
e votimit në Mitrovicë e në Zveçan, duke krijuar një atmosferë dhune e kërcënimi.
Tri qendra janë sulmuar nga njerëz të armatosur, që i detyruan kështu, trupat e misionit
evropian Eulex të ndërhyjnë e ta pezullojnë votimin. Materiali nga këto qendra, që
duhej të shqyrtohej nga ndërkombëtarët, thuhet se ka humbur. Natyrisht, si Brukseli,
ashtu edhe organizma të tjera ndërkombëtare, kanë shpejtuar të dënojnë aktet, megjithëse
deklarata zyrtare e vëzhguesve të OSBE-së do të jepet nesër. Nga Beogradi ngrenë duart
lart, pa ditur se kujt t’ia vënë fajin e duke e përkufizuar gjendjen si konfuzion.
Kujtojmë se qeveria i pati këshilluar serbët e veriut të votojnë. Ndërkaq, në
pjesën tjetër të vendit, 46% e zgjedhësve ka marrë pjesë në votime, duke arritur të
zgjedhë, në turnin e parë, së paku 10 kryetarë bashkie. Në 24 komuna të tjera, do
të kemi ballotazh, më 1 dhjetor. Në përgjithësi, numërimi i votave tregon rritjen
e konsensusit për Lidhjen Demokratike të Kosovës, themeluar nga Ibrahim Rugova, e
rënien e Partisë Demokratike të Kosovës, kryesuar nga Hashim Thaçi. “Lus Zotin
– shkruante në mesazhin e tij ipeshkvi, imzot Dodë Gjergji – që faza e votimit dhe
ajo e numërimit të votave të jenë transparente dhe të ndershme, për të respektuar
me përpikmëri vullnetin e votuesve”. Faza e votimit la për të dëshiruar, faza e numërimit
të votave duhet të presë 1 dhjetorin. Deri atëherë, ta lusim të gjithë Atin Qiellor
t’u shndrisë mendjen politikanëve e përgjegjësve të tjerë kosovarë.