Në Romë, koncert i Koreve të Patriarkanës së Moskës e të Kapelës Sikstine
Traditat e lashta të muzikës kishtare ruse e të polifonisë së shkollës romake, bashkohen
në koncertin e sontëm, në orën 21.00, në Bazilikën e Shën Marisë së Madhe. Është Koncerti
i tretë i Festivalit XII Ndërkombëtar të Muzikës e Artit Kishtar. Protagonistë, nënvizon
agjencia Sir, Kori Sinodal i Patriarkanës së Moskës, një nga formacionet më të lashta
e më të njohura korale ruse, themeluar në Moskë, në vitin 1721, sot drejtuar nga Aleksej
Puzakov, dhe ai i Kapelës Muzikore Papnore ‘Sikstina’, drejtuar nga Masimo Palombela.
Koncerti, shpjegojnë organizatorët, mishëron në tinguj dëshirën për thellimin
e dialogut ekumenik, përmes shkëlqimit të traditave të ndryshme të muzikës kishtare
e asaj liturgjike. Mbrëmja muzikore, në një nga tempujt marianë më të bukur
në botë, do të hapet me Te Deum të Dimitri Bortnjanskij(1751-1825), pasuar
nga këngët gregoriane të polifonisë klasike romake, për të përfunduar me kompozime
tejet të rralla polifonike ruse të Tetëqindës e të Nëntëqindës, disa nga të cilat,
vepra të Çajkovskit e Rahmaninovit. Koncerti organizohet me ndihmën e Fondacionit
“Qendra për zhvillimin e marrëdhënieve Itali-Rusi”.