Angola: dhunohet shtatorja e Zojës së Muximës. Ipeshkvi e dënon ashpër aktin
“Veprim i përgatitur gjakftohtësisht e poshtërsisht”. Kështu shprehet imzot Ferreira
Lopes, ipeshkëv i Vianës, për dhunimin e shenjtërores së Muximës, në Angolë. Sipas
Radio Ecclesia (emitente e Kishës angoliane) pak ditë më parë, 6 persona të paidentifikuar
fyen e shkatërruan disa figura të Zojës së Bekuar, të nderuara në shenjtërore. Për
fat, shtatorja kryesore e Zojës së Muximnës pësoi dëme, që mund të ndreqen, ndërsa
figurat e tjera, nuk mund të kthehen më në gjendjen e parë. Akti i dhunshëm, pohon
ipeshkvi, u krye pikërisht në ditën e përfundimit të ‘Vitit të Fesë’ në Angolë. Sapo
e morën lajmin, qindra besimtarë u sulen në drejtim të kishës, për të protestuar.
Ipeshkvi mundi ta qetësojë turmën, por pa harruar të nënvizojë se, përveç dëmeve materiale,
autoritetet duhet të llogarisin edhe dëmet më pak të dukshme, dëmet morale, që godasin
në zemër të njerëzve, duke ngjallur zemërim në gjirin e popullsië, plot me devocion
për simbolet e veta fetare.