2013-11-02 11:26:21

Ֆրանչիսկոս Սրբազան Քահանայապետի 2 նոյեմբերի գործունէութիւնը։


Շաբաթ, 2 նոյեմբերի առաւօտեան, Ֆրանչիսկոս Սրբազան Քահանայապետը Տոմուս Սանդա Մարդայի մատրան մէջ մատոյց առօրեայ սուրբ պատարագը։ Ան ապա ժամը 11,15-ին, միշտ Տոմուս Սանդա Մարդայի մէջ, ընդունեց` Քահանայապետական գիտութեան ակատեմիայի նախաձեռնութեամբ կազմակերպուած ''մարդավաճառութիւնը` ժամանակակից ստրկութիւն'' վերտառութեամբ հաւաքի մասնակիցները, իսկ յետմիջօրէի ժամը 6-ին, օր մեռելոցի առթիւ, ս. Պետրոսի Մայր Տաճարի գետնադամբանին մօտ, Սրբազան Հայրը կ՛ամփոփուի աղօթելու` ննջեցեալ քահանայապետներու հոգւոյն դիտաւորութեան։
Յայտնենք որ Ֆրանչիսկոս Պապը երէկ` 1 նոյեմբերի յետմիջօրէի ժամը 4.00 ին, ''Ամենայն Սրբոց'' տօնին առթիւ, Հռոմի ''Գամբօ Վերանօ'' կոչուած գերեզմանատունը այցելեց ու անոր մուտքին, գլխաւորեց հոգեհանգստեան սուրբ պատարագը, որուն ներկայ գտնուեցան Հռոմի տեղապահ արքեպիսկոպոս Կարտինալ Ակոսդինօ Վալլինին, Հռոմի թեմի եպիսկոպոսներն ու կղերական դասը ինչպէս նաեւ բազմաթիւ հաւատացեալներ։
Իսկ վաղը` կիրակի 3 նոյեմբերի կէսօրին, Ֆրանչիսկոս Քահանայապետը, աւանդութեան համաձայն, իր գրասենեակի պատուհանէն պիտի արտասանէ Հրեշտակ Տեառն Մարեմեան Աղօթքը։







All the contents on this site are copyrighted ©.