Ізраільскі дыпламат: Францішак не баіцца кантактаў з яўрэямі
Былы пасол Ізраіля
пры Святым Пасадзе Мардэхай Леві высока ацаніў сяброўскія адносіны папы Францішка
да яўрэяў і заклікаў апошніх да актывізацыі дыялогу з хрысціянамі. Вынікі паўгадовага
пантыфікату здаюцца з яўрэйскага пункту гледжання часам “занадта добрымі, каб быць
праўдай”, напісаў іранізуючы Леві на старонках публікаванага ў Берліне штотыднёвіка
“Jüdische Allgemeine”. У той жа час, ён не паддае ніякаму сумневу добрыя намеры папы
Францішка, які дэманструе, што “не баіцца кантактаў з яўрэямі”.
Больш за тое,
Пантыфік ставіць перад яўрэямі задачу, “якая не была вырашана да гэтага часу”. “Большасць
нашых братоў у веры” закрытыя да сённяшняга дня на інтэнсіфікацыю дыялогу, напісаў
Леві, гаворачы пра вызнаўцаў юдаізму. Гэта, на яго думку, з’яўляецца вынікам “пэўнага
самаўзвышэння”, а таксама відавочнага страху. У той час, як хрысціяне шырока ўдзельнічаюць
у міжрэлігійным дыялогу, яўрэйскія партнёры не адказваюць узаемнасцю на гэту прапанову.
Фрэнцішак – гэта “заўзяты прадстаўнік тэндэнцыі прымірэння, якая была закладзена на
ІІ Ватыканскім Саборы”, лічыць ізраільскі дыпламат.
На думку Леві, шматлікія
яўрэі выступаюць супраць гэтай тэндэнцыі “з-за страху перад кантактам з гістарычнай
магчымасцю ўдзелу ў плённым дыялогу, каб, нарэшце, пачаць новую главу ў юдэйска-хрысціянскіх
стасунках”. Яны ўсё яшчэ баяцца падвергнуцца “місіянізацыі”. Такія страхі Мардэхай
Леві назваў неабгрунтаванымі і спаслаўся на саборную дэкларацыю “Nostra Aetate” пра
адносіны Каталіцкага Касцёла да нехрысціянскіх рэлігій.