«Սուրիոյ Քիմիական Զէնքերէն Ձերբազատիլը Քաղաքացիական Պատերազմին Վերջ Տալուն Այլընտրանք
Մը Չէ» Ըսաւ Քերրի
Միացեալ Նահանգներու արտաքին գործոց նախարար Ճոն Քերրի ողջունեց միջազգային հետաքննիչներու`
սուրիական քիմիական զէնքերու ոչնչացման առաջին հանգրուանը յաջողութեան պսակելը` շեշտելով,
որ «քիմիական զէնքերէն ձերբազատիլը քաղաքացիական պատերազմին վերջ տալուն այլընտրանք մը
չէ եւ Սուրիոյ մէջ տակաւին ահագնացող մարդկային աղէտին վերջ չի տար»: Ան հաղորդագրութիւն
մը հրապարակելով յայտնեց, որ «միջազգային հետաքննիչները Սուրիոյ քիմիական զէնքերէն ձերբազատուելու
եւ անոնց դարձեալ օգտագործման կարելիութիւնը սահմանափակելու հարցով առաջին ձեռքբերումը
իրագործելու համար աննախադէպ արագութեամբ աշխատեցան»: «Ներկայիս պէտք է վստահ ըլլանք,
որ այդ առաքելութիւնը վերջ գտած է, եւ այդ բոլոր արգիլեալ զէնքերը վերցուած ու ոչնչացուած
են: Ասիկա կարեւոր յառաջընթաց մըն է, որ շատեր անկարելի կարծեցին: Այս յառաջընթացը պէտք
է շարունակուի», ըսաւ Քերրի: «Սուրիոյ պարտաւորութիւնները յստակ են: Անիկա ամբողջական
կերպով պէտք է ենթարկուի Ապահովութեան խորհուրդի թիւ 2118 որոշումին եւ Քիմիական զէնքի
տարածման կանխարգիլման գործադիր խորհուրդի որոշումին պահանջներուն», նշեց ան: Ռուսիոյ
վարչապետ Տմիթրի Մետվետեւ շեշտեց, որ Սուրիոյ նախագահ Պաշշար Ասատի հեռացումը իբրեւ «Ժընեւ-2»
խորհրդաժողովի գումարման նախապայման ճշդելը անընդունելի եւ անիրապաշտ է, մինչեւ անոր
քաղաքական եւ անձնական երաշխիքներ չտրուին` յոյս յայտնելով, որ խորհրդաժողովը տարեվերջին
կը գումարուի: Սուրիոյ հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմի
նշեց, որ «Ժընեւ-2»-ը Սուրիոյ տագնապէն դուրս գալու սկիզբը պիտի ըլլայ եւ անոր նպատակը
«Ժընեւ-1»-ի որոշումները գործադրելն է, այն տարբերութեամբ, որ «Ժընեւ-1»-ին Սուրիան ներկայացուած
չէր, իսկ «Ժընեւ-2»-ին ընդդիմութիւնն ալ պատուիրակութիւն մը պիտի ունենայ` աւելցնելով,
որ սուրիական ընդդիմութեան ներկայութիւնը հիմնական, կենսական ու կարեւոր է: Իպրահիմի
ընդգծեց, որ «Սուրիոյ մէջ լուծումը քաղաքական է եւ ոչ թէ զինուորական»` նշելով, որ ինք
ռուսական եւ ամերիկեան պատուիրակութիւններուն հետ հանդիպում պիտի ունենայ` խորհրդաժողովը
նախապատրաստելու եւ անոր գումարման վերջնական թուականի մը շուրջ համաձայնելու համար: