2013-11-01 09:17:43

Ֆրանչիսկոս Սրբազան Քահանայապետի Այցը Հռոմի ''Գամբօ Վերանօ'' Գերեզմանատան։


Ուրբաթ 1 նոյեմբերի յետմիջօրէի ժամը 4-ին, Ամենայն Սրբոց տօնին օրուայ առթիւ, Ֆրանչիսկոս Սրբազան Քահանայապետը կ՛այցելէ Հռոմի ''Գամբօ Վերանօ'' պատմական գերեզմանատունը ուր` մուտքին կը գլխաւորէ հոգեհանգստեան սուրբ պատարագը։ Նորին Սրբութեան հետ կը համապատարագեն ` Հռոմի տեղապահ արքեպիսկոպոսը Կարտինալ Ակոսդինօ Վալլինիին ու թեմի տեղակալ արքեպիսկոպոս` գերապայծառ Ֆիլիբբօ Իաննոնէն, թեմական եպիսկոպոսներն ու կղերի անդամները։
Ֆրանչիսկոս Սրբազան Քահանայապետի այս այցելութիւնը կը զուգադիպի Քահանայապետի մը ''Գամբօ Վերանօ'' այցելութեան 20 ամեակին։ Արդարեւ 1993-ին, երջանկայիշատակ Յովհաննէս Պօղոս Բ քահանայապետը եղաւ վերջին քահանայապետը որ այցելեց հռոմի գերեզմանատունը։ Պենետիկտոս ԺԶ վաստակաւոր քահանայապետը երբեք չէ այցելած գերեզմանատունը, թէեւ 2008-ին, պատարագ մատոյց, գերեզմանատան մուտքին մօտ գտնուող ''Սան Լորէնցօ ֆուորի լէ մուրա'' անուան պազիլիքայի մէջ։
Պիոս ԺԲ-րդ քահանայապետը գերեզմանատաունը այցելած էր 19 յուլիս 1943, համաշխարհային Բ պատերազմի օրերուն, Սան Լորէնցօ շրջանի ռմբակոծումէն ետք։ Յովհաննէս ԻԳ քահանայապետը Գամբօ Վերանօ այցելեց` 3 նոյեմբեր 1959-ին մինչ Պօղոս Զ-ը` 2 նոյեմբեր 1963-ին պատարագ մատոյց ''Սան Լորէնցօ ֆուորի լէ մուրա'' անուան պազիլիքայի մէջ ու ապա 1 նոյեմբեր 1964-ին այցելեց ''Բրիմա Բորդա'' կոչուած, Հռոմի երկրոդ գերեզմանատունը։
Յովհաննէս Պօղոս Բ-ը 1979-էն մինչեւ 1993, գրեթէ ամէն տարի կ՛այցելէր Գամբօ Վերանոյի գերեզմանատունը ու ապա առողջապահական խնդիրներու բերումով, 1993-էն, Ամենայն Սրբոց տօնին օրը Գամբօ Վերանոյի մէջ պատարագ մատուցելու աւանդութիւնը յանձնուցեաւ Հռոմի թեմի տեղապահ արքեպիսկոպոսին։
Գամբօ Վերանոյի գերեզմանատունը հռոմի պատմական գերեզմանատունն է որուն առաջին կառոյցը կը պարտինք ճարտարապետ Ճուզեփփէ Վալատիէի` 1835 թուականին։ Գամբօ Վերնաոյի գերեզմանատան մէջ զետեղուած են աշխարահռչակ անձնաւորութիւններու աճիւնները ու անոր մէջ գտնուող գեղարուեստական գործերը, Գամբօ Վերանոին կը շնորհեն մշակութային եւ պատմա-արուեստական իւրայատուկ բնոյթ։








All the contents on this site are copyrighted ©.