Высокі прадстаўнік
ватыканскай дыпламатыі наведаў Кувейт. Арцыбіскуп Анджэла Бэчу, субстытут Святога
Пасаду, прысутнічаў 30 кастрычніка 2013 г. на інаўгурацыі новага будынка Апостальскай
нунцыятуры ў у Эль-Кувейце. У мерапрыемстве прынялі ўдзел члены дыпламатычнага корпуса,
прадстаўнікі хрысціянскіх канфесій, мясцовае духавенства, а таксама прадстаўнік уладаў,
Насэр аль Мазаен, дырэктар Дэпартаменту краін Персідскага заліва. У сваім выступленні
арцыбіскуп Бэчу падзякаваў ад імя Святога Айца і Каталіцкага Касцёла за падтрымку
і разуменне, прадэманстраваныя кіраўніцтвам Кувейта, духоўных патрэб больш за 350
тыс. католікаў у краіне на працягу 45 гадоў дыпламатычных адносін са Святым Пасадам.
Субстытут падзякаваў уладам іншых краін Персідскага заліва, дзе жывуць і працуюць
каля 3 млн. вернікаў Каталіцкага Касцёла. Ён выказаў спадзяванне, што “прысутнасць
шматлікіх хрысціян у рэгіёне і намаганні Апостальскай нунцыятуры” паспрыяюць сапраўднаму
дыялогу і супрацоўніцтву, узаемнай павазе і сяброўству, а таксама мірнаму суіснаванню.
Падчас
свайго візіту ватыканскі дыпламат наведаў таксама Вялікую мячэць у Эль-Кувейце. Ён
сустрэўся ў каталіцкім катэдральным касцёле з мясцовым духавенствам і правёў прыватныя
размовы з двума Апостальскімі вікарыямі. 31 кастрычніка арцыбіскуп Бэчу вярнуўся ў
Рым.