Արհիապատիւ Ռաֆայէլ Արքեպս. Մինասեանի՝ Հովուական թուղթը ''Հաւատք եւ Աւետարանացում''
Աստուած, մարդը՝ Ադամը իր կերպարանքով եւ նմանութեամբ ստեղծեց (Ծննդ.1,26), Արհիապատիւ
արքեպիսկոպոսը գրած է. Տրամաբանական երեւոյթ է հաւատքի աղբիւրները գտնել նախ, Հին
Կտակարանի, Ծննդոց գրքին՝ Արարչագործական պատմութեան մէջ: Աստուած, մարդը ըստ իր պատկերին
եւ նմանութեան ստեղծեց, կ’ըսէ Ս. Գիրքը: Դրախտին մէջ բնակեցուց ու անոր հետ բարեկամական
յարաբերութիւն մշակեց մինչեւ իր մեղքի մէջ իյնալը: Անոր համար կարելի է ենթադրել, որ
Աստուծոյ Հաւատալու սկզբնակէտը հոս ծնունդ առած ըլլայ. քանի Ադամն ու Եւան տեսան ու ճանչցան
զԱստուած ու հաւատացին Անոր իրականութեան: Դրախտէն արտաքսուելով, անոնք իմացան, որ
իրենց գործած մեղքին համար էր այդ հեռացումը: Այն մեղքը անհնազանդութիւնն է, որ կոչուեցաւ
սկզբնական մեղք: Արդ իմանալով իրենց էութիւնը եւ գործած մեղքին ծանրութիւնը, հաւատացին
Աստուծոյ գերագոյն արդարութեան: Ադամ ու Եւայի Հաւատքին հետ աճեցաւ յոյսը, որով Աստուած
պիտի վերականգնէր նախնական փոխյարաբերութիւնը: Աստուած իր գերագոյն արդարութեամբ մարդը
պատժեց, սակայն որպէս կատարեալ սիրոյ Աստուած, դարձեալ պիտի փրկէր: Անոր համար Ս. Պօղոս
կ’ըսէ «Առանց հաւատքի կարելի չէ գոհանալ Աստուծոյ»: Ուստի հաւատքը, ինչպէս որ կը յայտնուի
Ս. Գրքի Հին Կտակարանի մէջ, աստուածային յատուկ նախաձեռնութիւն մըն է: Հին Կտակարանի
պատմութիւնը գրուած է այն նպատակով, որ Աստուծոյ Հօր հետ վերականգնուի հաշտութիւնը, սակայն
հաշտութեան համար հարկ էր փրկագին մը, որ խոստացեալ Փրկիչը՝ Միածին Որդին պիտի վճարէր:
Արդ, Հին Կտատարանի բոլոր քայլերը այն ուղղութեամբ կ’ընթանան, լրացնելու համար հարկաւոր
պատրաստութիւնները: Մեր հովուական թուղթին նպատակն է նաեւ, (գրած է Գերապայծառը)
շեշտել աստուածային նախաձեռնութեան առատահոս շնորհքներուն, որ Աստուած մեզի պարգեւեց
նախ Հին Կտակարանի միջոցաւ, ապա հաւատալու Անոր կատարեալ հայրութեան: Այս աստուածային
անպարագրելի նախախնամութիւնը շարունակաբար ի յայտ կու գայ Հին կտակարանին մէջ՝ Ադամի
դրախտէն արտաքսուած եւ մեղքի մէջ ինկած վայրկեանէն սկսեալ, մինչեւ Քրիստոսի գալուստը:
Աստուած, ժամանակի ընթացքին, մարդուն հետ կը մնայ հաստատ, եւ իբրեւ վառ օրինակ, ունինք
Աբրահամի, Յակովբի եւ վկայութիւնը Իսահակի հաւատքին Ս. Գրքին մէջ: Այս օրինակները, անկիւնադարձ
իրականութիւն մըն են որ կը յիշատակուին եւ կը բերուին, որպէս անխախտ յարաբերութիւն Աստուծոյ
եւ մարդու միջեւ: Աւելի ուշ, Յիսուս Քրիստոս, իր քարոզութեան մէջ պիտի յիշէր Հարիւրապետի
հաւատքին ոյժն ու կարեւորութիւնը երբ բժշկեց անոր հիւանդ զաւակը (Մաթ. 8,11-12): Ասոր
համար ալ կը տեսնենք աստուածաբաններուն մօտ, Հաւատքին մասին գրած ատեն, հաճոյքով կը մէջբերեն,
Աբրահամի օրինակը, արտայայտելու համար անոր անսակարկ հաւատքն ու անխարդախ վստահութիւնը
Աստուծոյ խօսքին ու խոստում ներուն վրայ: Աստուած Աբրահամը կը փորձէ եւ որպէս պատասխան,
կ’ընդունի Աբրահամի լիավստահ հաւատարմութիւնը իրեն հետ կնքուած դաշինքին: Այսպիսով Աստուած,
փոխադարձաբար կը վերահաստատէ իր սէրն ու օրհնութիւնը Աբրահամին եւ անոր սերունդին վրայ,
կ’ըսէ Ս. Գիրքը (Ծննդ.12): Աստուածաբանները, այսօր ալ, ինչպէս եկեղեցին, հաւատքը
արծարծելու մտահոգութեամբ, դարձեալ Աբրահամի օրինակը կը բերեն վերականգնելու հաւատքի
հոգեւոր արժէքներն ու գործնական ապրումները: Եկեղեցին «Նոր Աւետարանացում» կ’առաջարկէ,
այսինքն նոր միջոցներու դիմել եւ նոր ճանապարհներ գտնել հաղորդելու միեւնոյն ճշմարտութիւնը,
Քրիստոսի ճշմարտութիւնը, որ մեզ կ’առաջնորդէ դէպի ճշմարիտ հաւատքը եւ փրկութեան ուղին:
Հին Կտակարանին հանդէպ, ունինք բարոյական պարտականութիւնը տեսնելու անոր մէջ փրկագործական
անմիջական նախապատրաստութիւնը: Աստուած մարգարէներու բերնով անդադար պատգամներ եւ նշաններ
կը ղրկէ իր ընտրեալ ժողովուրդին: