Kardinal Filoni në Pakistan: Është e mundur të jesh edhe i krishterë edhe pakistanez
“Takimi me ju të gjithë është një kënaqësi e madhe për mua. Do të thosha se, përmes
jush, po takoj tërë Kishën e këtij vendi të dashur”, tha Prefekti i Kongregatës për
Ungjillëzimin e Popujve Kardinal Filoni, në homelinë gjatë kremtimit eukaristik sot
paradite në katedralen e Lahorit, ku merrnin pjesë ipeshkvinj, meshtarë, rregulltarë
e rregulltare, seminaristë, katekistë e përfaqësues të bashkësisë dioqezane. Prefekti
i Dikasterit që mbulon misionet tha ndër të tjera: “Do të dëshiroja që ndjenjat e
mia të prekin të gjithë vëllezërit e motrat e së njëjtës fe dhe që të mos e ndjejnë
kurrë veten të lënë në harresë. Ju jeni pjesa më fisnike, – edhe për shkak të rrethanave
e të vështirësive – e Kishës Universale, sikurse janë edhe bashkësitë e tjera nëpër
botë, që dëshmojnë me guxim, çdo ditë, fenë e tyre në Krishtin e besnikërinë ndaj
Kishës. Duke komentuar leximet e sotme, Kardinali nënvizoi se “Krishti është pika
jonë e referimit në çdo rrethanë e për çdo rast, edhe në vështirësi, madje edhe nën
përndjekje”, sikurse na mëson Apostulli Pal. Pastaj i ftoi të pranishmit ta vijojnë
angazhimin e tyre për paqen e mirësinë, me qëndresë e guxim. Prefekti i Kongregatës
për Misionet vuri në dukje se “qenia i krishterë dhe pakistanez nuk është diçka që
bie në kundërshtim me vetveten. Në këtë tokë, ku gjenden shumë kombësi, shumë realitete
kulturore e gjuhësore, ku Islami është feja mbizotëruese, i krishteri është në shtëpinë
e vet dhe në këtë larmi gjen një pasuri për jetën e jo kundërvënien. Uniformiteti
(njëtrajtësia) sjell varfërim, ndërsa larmia ngjall shtysa të reja.” Të krishterët,
tha Kardinali, janë të thirrur për të qenë kripë e dritë në çdo rrethanë e vend ,
dhe saktësoi: “Kripa nuk e zëvendëson ushqimin, por i jep shije. As drita nuk e ndryshon
realitetin, por e ndriçon. Nëse e kemi të qartë këtë vizion, mund ta kuptojmë më mirë
thirrjen tuaj, pse gjendeni këtu ju, cila është detyra juaj dhe misioni që ju ka besuar
Provania Hyjnore”. Nesër Kardinali Filoni do të kryesojë meshën për shugurimin
e ipeshkvit të Faisalabadit