Նոյեմբեր 8-10-ը Սթամպուլի մէջ տեղի պիտի ունենայ «Իսլամացուած Հայեր» գիտաժողովը
«Հրանդ Տինք» հիմնադրամին կողմէ կազմակերպուող «Իսլամացուած հայեր» խորագիրով գիտաժողովը,
որ պէտք է կայանար 11-13 Հոկտեմբեր 2013-ին, տեղի պիտի ունենայ Նոյեմբեր 8-10-ը Սթամպուլի
մէջ: Այս մասին կը հաղորդէ «Սիվիլնէթ»-ը: 19-րդ դարու վերջը եւ 20-րդ դարու սկիզբը
Օսմանեան կայսրութեան մէջ կարեւոր քաղաքական եւ հասարակական վերափոխումներու ժամանակաշրջան
էր, երբ տեղի ունեցան նաեւ անհատական եւ զանգուածային կրօնափոխութեան դէպքեր: Տարբեր
ժամանակափուլերու մէջ տարբեր գործընթացներու հետեւանքով մեծ թիւով հայեր իսլամացան: Անոնց
թիւը յատկապէս աճեցած է 1915-1916 թուականներուն.: Մինչեւ վերջերս պատմութեան մէջ լուռ
անտարբերութիւն կար իսլամացուած հայերու նկատմամբ, որ որոշակիօրէն խախտուած է վերջին
տարիներուն հրապարակուած աշխատութիւններով: Գիտաժողովին նպատակը իսլամացաուած հայերու
խնդիրներուն եւ դժուարութիւններուն ու անոնց հետեւանքներու ըմբռնումն է, միւս կողմէ`
այդ լռութեան խախտման գործընթացը ուսումնասիրելն ու քննարկելն է: Գիտաժողովին նպատակը
նաեւ շարք մը կարեւոր հարցերու անդրադարձն ու անոնց քննարկումն է, ինչպէս օրինակ` ի՛նչ
դժուարութիւններու դէմ առերեսուած են իսլամացուած հայերը, ինչպէս այդ ամէնը ազդած է անոնց
յետագայ սերունդներուն վրայ, ինչպէս ներկայիս քաղաքական զարգացումները կ’ազդեն անոնց
կեանքին վրայ, որոնք են անոնց պատմութիւններուն ուշ բացայայտուելուն պատճառները եւ անոնց
մասին տեղեկութիւններու սահմանափակ ըլլալը եւ այլն: Կ’ակնկալուի նաեւ անցեալի ու ներկայի
բռնութիւններու, խտրկանութեան եւ անարդարութեան կարգ մը դէպքերու քննարկում: