Shoqëria e familja, në qendër të mesazhit të Papës për Këshillin Ekumenik të Kishave
Në Busan, të Koresë së Jugut, u hap sot e do të përfundojë më 8 nëntor, asambleja
e përgjithshme e Këshillit Ekumenik të Kishave, ku Selia e Shenjtë merr pjesë si vëzhguese.
Tema e sivjetme: “Zoti i Jetës, na prij kah drejtësia e paqja”. Pikërisht kësaj
asambleje, Papa Françesku i drejtohet me një mesazh, në të cilin thekson impenjimin
e Kishës Katolike për të vazhduar bashkëpunimin me Këshillin Ekumenik. “Bota e globalizuar
– nënvizon Ati i Shenjtë – u kërkon të krishterëve të dëshmojnë vlerën e dinjitetit
të njeriut, që vjen prej Zotit”. Kjo arrihet përmes edukimit të gjithanshëm të të
rinjve, përmes vënies së njeriut në qendër të çdo veprimtarie, sepse vetëm kështu,
u jepet të gjithëve – individë e bashkësi – mundësia për t’u zhvilluar në liri. Papa
Bergolio kërkon “mbështetje për familjen, qeliza themelore e shoqërisë” dhe “garanci
për ushtrimin e lirisë fetare”. “Besnikë ndaj Ungjillit – shkruan Papa – jemi
të thirrur të shkojmë tek të gjithë ata, që ndodhen në periferitë ekzistenciale të
shoqërisë e, t’u çojmë solidaritetin tonë motrave e vëllezërve më nevojtarë”. Ati
i Shenjtë nuk mungon t’i përmendë një nga një: “të varfërit, njerëzit me aftësi të
kufizuara, të sapolindurit, të sëmurët, emigrantët, refugjatët, të moshuarit e të
rinjtë pa punë”. Papa Françesku siguron se do të lutet që asambleja të kontribuojë
për t’i dhënë hov të ri punës për bashkimin e të krishterëve. Mesazhin e Papës
e çoi në asamble kryetari i Këshillit Papnor për nxitjen e bashkimit të të krishterëve,
kardinali Kurt Koh. Kujtojmë se Asambleja e Këshillit Ekumenik të Kishave mblidhet
çdo shtatë vjet. Marrin pjesë në të rreth 3 mijë delegatë zyrtarë, përfaqësues të
345 Kishave, bashkësive kishtare e organizatave të ndryshme. Pavarësisht se nuk është
anëtare e Këshillit, Kisha Katolike bashkëpunon me të, sidomos përmes Komisionit “Feja
e Kushtetuta”, që ka për detyrë të reflektojë mbi çështjet, që edhe sot i ndajnë të
krishterët, në veçanti, ekleziologjia. Që nga viti 1965, është ngritur një Grup i
përzier pune, strukturë kryesore e koordinimit të marrëdhënieve ndërmjet Kishës Katolike
dhe Këshillit Ekumenik të Kishave.