Ֆրանչիսկոս Սրբազան Քահանայապետը ընդունեց Վատիկանի Հեռուստակայանի անձնակազմը։

Երկուշաբթի 28 հոկետմբեր 2013-ի առաւօտեան ժամը 10,30-ին, Ֆրանչիսկոս Սրբազան Քահանայապետը իր գրասենեակի մէջ ընդունեց Ճաբոնի նորանշանակ դեսպան` Տիար Թէտուագի Նակազագի, հաւատարմագրերու ներկայացումի առթիւ։ Սրբազան Հայրը ապա յաջորդաբար ընդունեց Հաւատոյ Ժողովի երբեմնի կառավարիչ` Կարտինալ Ուիլլիամ Ժոզէֆ Լէվատա եւ Համաշխարհային Դրամատան Նախագահ` Տիար Ժիմ Եոնկ Գիմ։ Ժամը 11,30-ին, Ֆրանչիսկոս պապը, միշտ իր գրասենեակի մէջ ընդունեց` 1991-ի խաղաղութեան մրցանակակիր Տիկ Աունկ Սան Սու Գիի` որ Պիրմանիայի մէջ հանրավարութեան հաստատումի ի խնդիր պայքարի առաջին դէմքերէն մին է։ Սրբազան Հայրը հուսկ, հրաժեշտի այցելութեամբ, ընդունեց` Ալպանիայի Սուրբ Աթոռի մօտ երբեմնի դեսպան` Տիար Րոգ Լոկո ու ապա ժամը 12-ին Գլեմենդինա Սրահին մէջ ունկնդրութիւնը շնորհեց Վատիկանի Հեռուստակայանի (CTV ) անձնակազմի 150 անդամներուն հեռուստակայանի ստեղծման 50-րդ տարեդարձին առթիւ։
Անոնց արտասանած իր խօսքին մէջ, Ֆրանչիսկոս Պապը մատնանշեց թէ ''Վատիկանի հեռուստակայանը ծնունդ առաւ 22 հոկտեմբեր 1983-ին, երանելի ՅՊԲ Քահանայապետի օրով''։ Ան ապա նշեց թէ հեռուստակայանը կը գտնուի արդի արուսետագիտութեան նոր մարտահրաւէրներու դիմաց եւ թէ հարկ է զանոնք դիմագրաւել, հաստատ պահելու համար ''աւետարանական հեռանկարը, հաղորդակցութեան համաշխարհային, տեսակ մը, մայրուղիի ծիրէն ներս'' ։
Ֆրանչիսկոս Քահանայապետը ապա շնորհակալութիւն յայտնեց հեռուստակայանի անդամներուն անոնց բարձրորակ ''արհեստագիտութեան'' համար որ - ըսաւ Ան - ''ճանչցուած է համայն աշխարհի մէջ'', ու մանաւանդ երախտագիտութիւն յայտնեց անոնց ` Եկեղեցւոյ ի սպաս մատուցած ծառայութեան համար։
Նորին Սրբութիւնը հուսկ յորդորեց աշխատիլ որպէս ''խմբային անձնակազմ'' որովհետեւ ''հաղորդակցութեան հովութիւնը կարելի է իրագործել ''կապեր հաստատելով'' եւ ''շարք մը ենթականեր համակեդրոնացնելով ընդհանուր ծրագիրներու շուրջ''։ Ան ապա ընգծեց արհեստագիտութեան օգտագործման կարեւորութիւնը ի սպաս Եկեղեցւոյ, որովհտեւ ''անհրաժեշտ է որ Վատիկանի Հեռուստակայանը իր հանդիսատեսներուն եւ հաւատացեալներուն փոխանցէ` Աւետարանի բոյրն ու յոյսը''։
Սրբազան Հայրը խօսքը եզրափակեց շնորհակալութիւն յայտնելով նաեւ բոլոր անոնց որ զանազան ձեւերով եւ միջոցներով կը համագործակցին CTV-ի անձնակազմին հետ, հաստատելով թէ ''շատ բաներ առանձին չենք կրնար իրագործել սակայն միասնաբար կրնանք համայն աշխարհին ծառայել, ամենուրեք տարածելով Աւետարանի գեղեցկութիւնն ու ճշմարտութիւնը''։