Міжнароднае рэйтынгавае агенцтва: ватыканскія фінансы сталі больш празрыстымі
Ватыкан зрабіў свае
фінансавыя аперацыі больш празрыстымі. Да гэтай высновы прыйшло рэйтынгавае агенцтва
“Standard Ethics”. У сваім рэйтынгу, апублікаваным 28 кастрычніка 2013 г., яно павысіла
класіфікацыю Ватыкана з “EE –” на “EE”. Маленькая дзяржава шчыльна падышла да міжнародных
стандартаў празрыстасці і аўдыту, гаворыцца ў паведамленні агенцтва, штаб-кватэры
якога знаходзяцца ў Лондане і Брусэлі. Найбольш важным крокам у гэтым кірунку стала
ўступленне ў сілу 8 кастрычніка 2013 г. новага закону па барацьбе з адмываннем грошай.
Ён пашырыў паўнамоцтвы Бюро фінансавай інфармацыі, як рэгулятара фінансавай дзейнасці
ў межах Ватыкана.
Рэйтынг “EE” азначае, што ўзровень бяспекі і празрыстасці
фінансавай сістэмы з’яўляецца вышэйшым за сярэдні. Найлепшы вінік – “EEE” атрымалі
толькі чатыры дзяржавы: Данія, Ісландыя, Нарвегія і Швецыя. Германія, Аўстрыя , і
дзевяць іншых дзяржаў былі ацэнены на “EEE –“. З рэйтынгам “EE” Ватыкан знаходзіцца
ў адной групе з Італіяй, Японіяй і Грэцыяй.
У адрозненне ад традыцыйнай ацэнкі
рэйтынгавых агенцтваў, “Standard Ethics” ацэньвае краіны па шкале ўстойлівасці і празрыстасці.
Асновай для гэтага з’яўляюцца кіруючыя прынцыпы Арганізацыі Аб’яднаных Нацый, Арганізацыі
эканамічнага супрацоўніцтва і развіцця і Еўрапейскага саюза. “Standard Ethics” уключыў
Ватыкан у свой рэйтынг у лютым 2013 г.