Papa pret Aung San Suu Kyi: mbështetje për kontributin për demokracinë në Mianmar
Papa Françesku, duke pritur sot, në Vatikan, birmanenAung San Suu Kyi,
Çmim Nobel për Paqen, theksoi posaçërisht impenjimin e saj kundër dhunës.
Bisedimet,
sipas një note të drejtorit të Sallës vatikanase të Shtypit, atë Federiko Lombardi,
zgjatën rreth 20 minuta. Papa e vlerësoi mysafiren si simbol i impenjimit kundër dhunës,
për demokracinë dhe paqen, për dinjitetin e njeriut dhe për bashkëjetesën paqësore
në botën e sotme, tema, natyrisht, shumë të dashura për Jorge Mario Bergoglion, takimi
i të cilit me çmimin Nobel për Paqen, shikohet si shumë domethënës. Përkim i
plotë ndërmjet Papës Françesku dhe udhëheqëses së opozitës birmane, për temat, që
Ati i Shenjtë i ka shumë për zemër, si kultura e takimit dhe dialogu ndërfetar. Takim
tejet i përzemërt, e quan atë Lombardi, duke kujtuar edhe vitet e gjata të vuajtjes
së udhëheqëses birmane, që dha një kontribut jo të paktë për mbrojtjen e të drejtave
të njeriut, larg çdo shprehjeje të përdorimit të dhunës. Audienca u mbajt në Bibliotekën
papnore e atë Lombardi njofton edhe se Papa Françesku i shprehu vlerësimin e tij,
duke e siguruar për bashkëpunimin e Kishës Katolike në të gjitha fushat e pa kurrfarë
dallimi, sepse Kisha është në shërbim të të gjithëve me veprimtaritë e saj bamirëse,
edhe në rastin e Mianmarit, vend me të cilin nuk ka marrëdhënie diplomatike. Atë
Lombardi kujton, më pas, se njihet nga të gjithë vëmendja e Papës Françesku për Azinë,
drejt së cilës ka shumë dëshirë të niset në shtegtim apostolik. Pasi mori dje titullin
‘Qytetare Nderi’ e Romës, sot, pra, për Aung San Suu Kyi ishte dita e takimit me Papën.
“Ati i Shenjtë më tha se ndjenjat si urrejtja dhe frika e ulin vlerën e jetës
së njeriut. Duhen vlerësuar dashuria e mirëkuptimi, për ta përmirësuar jetën e popujve”
pohoi liderja birmane, duke folur për audiencën me Atin e Shenjtë, gjatë një konference
shtypi.Kujtojmë se vizita në Romë është pjesë e shtegtimit në Evropë të prijëses së
opozitës birmane e cila, më 2015, do të kandidohet në zgjedhjet presidenciale.