Papa: Jezusi vijon të lutet edhe sot për ne, duke ia treguar Atit plagët e veta
Jezusi vijon të lutet e të ndërmjetësojë për ne, duke i treguar Atit çmimin, që iu
desh të paguante për shëlbimin tonë: plagët. Këtë theksoi sot Papa Françesku gjatë
Meshës, kremtuar në Shtëpinë e Shën Martës, në ditën kur Kisha katolike përkujton
Shenjtorët Simeoni e Judë Tadeu, Apostuj.
Në qendër të
vëmendjes, në homeli, fragmenti i Ungjillit, në të cilin Jezusi e kalon gjithë natën
në uratë, para se të zgjedhë dymbëdhjetë Apostujt. Zoti formon skuadrën e Tij, nënvizoi
Papa, e shumë shpejt nis të rrethohet nga një turmë e pafundme njerëzish, që vijnë
për të dëgjuar e shkojnë të shëruar, sepse prej Tij buron një forcë, që i shëron të
gjithë. Janë tri, lidhjet kryesore të Jezusit, vërejti Papa Françesku: Jezusi lidhet
ngushtë me Atin; Jezusi lidhet ngushtë me Apostujt e vet e lidhet ngushtë edhe me
njerëzit. Jezusi i lutej Atit për Apostujt e edhe për të gjithë njerëzit. E vijon
t’i lutet edhe sot: “Është ndërmjetës, Ai që lutet, që i lutet Atit për ne,
para nesh. Jezusi na shpëtoi, bëri lutjen e madhe, fijimin e Tij, të jetës së Tij,
për të na shëlbuar, për të na shfajsuar: jemi të drejtë, për virtyt të Tij. Tani shkoi,
e lutet. Po Jezusi është shpirt? Jezusi nuk është shpirt. Është Vetje, njeri, me mish
e gjak, si ne, por me një ndryshim: Ai është në lumni. Jezusi i ka ende plagët mbi
duar, mbi këmbë, mbi kraharor, lutet, ia tregon Atit këtë çmim, që iu desh të paguante
për shfajsimin tonë, e lutet për ne, si të donte të thoshte: “Bëj, o Atë, që ky të
mos humbasë!”. Jezusi u prin lutjeve tona, sepse është Ai i pari, që lutet,
është vëllai ynë, njeri si ne, që ndërmjetëson për ne: “Në fillim të fillimit
Ai na shpërbleu, na shfajsoi të gjithëve; po tani, çfarë bën? Ndërmjetëson, lutet
për ne. Unë mendoj ç’do të ketë ndjerë Pjetri, kur e mohoi. E pastaj, kur Jezusi e
pa, ai qau. E ndjeu se ajo, që kishte thënë Jezusi, ishte e vërtetë: Krishti ishte
lutur për të, prandaj mund të qante, mund të pendohej. Shpesh herë i themi njëri-tjetrit:
‘Lutu për mua! Kam nevojë, jam para shumë problemesh të vështira, gjërash të ngatërruara:
lutu, prandaj, për mua!’. E kjo është gjë e mirë, apo jo? Sepse ne, që jemi vëllezër,
duhet të lutemi njëri për tjetrin”. Papa na nxit t’ia lypim Zotit lutjen: “Lutu
për ne, o Zot, Ti je ndërmjetësi": “Ai lutet për mua; Ai lutet për të gjithë
ne e lutet guximshëm, sepse e bën Atin të shikojë çmimin e paguar për drejtësinë
tonë: plagët e veta. Të mendojmë shumë për këtë. E ta falënderojmë Zotin. Ta falënderojmë
pse kemi një vëlla, që lutet për ne, që ndërmjetëson për ne. E të flasim me Jezusin,
t’i themi: ‘Zot, Ti je ndërmjetësi, Ti më shpëtove, më shfajsove. Por tani lutu për
mua’. T’ia besojmë atij problemet tona, jetën tonë, të gjitha gjërat, Atij, që ai
të na çojë tek Ati”.