«Ով որ իր խաչը չ'առներ եւ ինծի չի հետեւիր, ինծի աշակերտ չի կրնար ըլլալ:» (Ղկ 14,
25-33) - Հայր Գէորգ Ծ. Վրդ. Զապարեանի Խորհրդածութիւնը։
Իր խաչը առնելը, որ վիճակուած է բոլոր մարդկային էակներուն, ծանր պատասխանատուութիւն
է: Խաչէն ոչ ոք կրնայ խուսափիլ: Խաչը մեր կեանքն է՝ իր դժուարութիւններով, տառապանքներով
եւ փորձանքներըով: Չեմ գիտեր թէ ի'նչ կը հասկնային Յիսուսի ժամանակակից ունկնդիրները
մեր Տիրոջ վերոյիշեալ հրաւէրէն խաչը առնելու եւ իրեն հետեւելու: Անոնք կ'անգիտանային
խաչ առնելու փրկարար արժէքը մինչեւ այն օրը երբ իրենց Վարդապետը խաչը շալկած տեսան: Այն
օ'րը միայն գիտակցեցան Փրկիչին կատարած մարդասէր վեհ ժեստին ամբողջական տարողութեան:
Անոնք հասկցան նաեւ որ մեր Տէրը իր կեանքը խաչին վրայ զոհելով՝ կը հրաւիրէր իր աշակերտները
թէ' իրենց խաչը, թէ' իրենց բոլոր եղբայրներուն խաչը կրելու: Մեզ տառապեցնող ու անհագստացնող
տպաւորութիւնը այն է որ խաչերը անհաւասար կերպով բաժնուած են: Մեզի կ'երեւի թէ ոմանք
իրենց կեանքը կ'ապրին իբրեւ յարատեւ խաչ մը, մինչ ուրիշներուն խաչը աւելի թեթեւ է: Երբ
նայելու ըլլանք Page4 մենք մեզի եւ մեր հարեւաններուն, կը փորձուինք տեսնել անոնց
անամպ երջանկութիւնը եւ մեր սեւ ճակատագիրը: Թէեւ ամէն բաղդատութիւն ատելի է սակայն
չենք կրնար չտեսնել հարեւանին պողպատեայ առողջութիւնը, ծով հարստութիւնը եւ չնակատել
մեր խոր ցաւերն ու անվերջանալի դրամական նեղութիւնները: Այսուհանդերձ, խաչ առնելու
հրամայականը յօժարութեամբ ընդունելով է որ պիտի կարենանք Յիսուսի հետեւիլ եւ անոր աշակերտ
ըլլալ: Այդ անխուսափելի պայմանով է որ ի վիճակի պիտի ըլլանք իրականացնել մեր կեանքը:
Խաչը կեանքի աճումին անշրջանցելի ազդակ մըն է: Ամէն յառաջդիմութիւն, ամէն յեղաշրջում,
ամէն աճում սերտօրէն կապուած է խաչին: Վերջակէտ չկայ առանց մէկնակէտի, ծնունդ չկայ առանց
ցաւի, կեանք չկայ առանց մահու: Յիսուս իր աշակերտները կը հրաւիրէ իրազեկ ըլլալու
այս իրականութեան եւ զայն ընդունելու իբրեւ կեանքի բաղադրիչ մաս: Օրին մէկը պիտի հասկցնէ
իր աշակերտներուն եւ, անոնց միջոցով, բոլոր ժամանակներու հետեւորդներուն որ իւրաքանչիւր
խաչի եւ նոյնիսկ իւրաքանչիւր մահու ետեւ՝ յարութիւն կայ, բաւէ որ մեր խաչը առած՝ իրեն
հետեւինք: