2013-10-25 12:00:18

ֆրանչիսկոս Պապը իր քահանայապետութեան առաջին եպիսկոպոսական օծումը կատարեց։


''Եպիսկոպոսութիւնը սպասարկութիւն մըն է եւ ոչ պատիւ''։

Հինգշաբթի, 24 հոկտեմբերի յետմիջօրէին, ֆրանչիսկոս Քահանայապետը, ս. Պետրոս տաճարին մէջ իր առաջին եպիսկոպոսական օծումը կատարեց, եպիսկոպոս օծելով երկու եկեղեցականներ` ֆրանսացի Ժան Մարի Սբեշ եւ իտալացի Ճիանբիդրօ Կլոտէր։ Առաջինը նշանակուած է առաքելական դեսպան` Ղանա հանրապետութեան մօտ, իսկ երկրորդը` նախագահն է եկեղեցական քահանայապետական կաճառին։
Այս առթիւ իր արտասանած քարոզին մէջ Սրբազան Հայրը ըսաւ. ''Եպիսկոպոսը կանչուած է սպասարկելու եւ ոչ իշխելու''։ Խօսքը ուղղելով ապա նորօծ եպիսկոպոսներուն յորդորեց զանոնք ըլլալու նախ եւ առաջ աղօթքի մարդիկ։ ''Ձեր սիրտը ըլլայ սիրով լեցուն, հօր մը ու եղբօր մը սիրոյ նման։ Ձեր սէրը ցոյց տուէք քահանաներուն, սարկաւագներուն եւ հաւատացեալներուն։ Մի մոռնաք մասնաւորապէս սիրել աղքատն ու անպաշտպանը'' - ըսաւ քահանայապետը։ Սրբազան արարողութեան ներկայ էին Իտալիոյ ու ֆրանսայի պետութեան ներկայացուցիչները։
Յայտնենք որ ֆրանչիսկոս Քահանայապետը որպէս Պուենոս Այրէսի առաջնորդ օծած էր 20 եպիսկոպոսներ։








All the contents on this site are copyrighted ©.