“Веру, ведаю, разумею”. Лячэнне духоўных хваробаў: сквапнасць і шчодрасць
Мы працягваем цыкл
разважанняў пад назвай “Лячэнне духоўных хваробаў”, у рамках якога размаўляем пра
глыбокія, часта цяжкія для распазнання духоўныя немачы, якія перашкаджаюць жыць па-сапраўднаму
поўна і шчасліва. Сёння мы пахілімся над чарговай “хваробай” – сквапнасцю, а таксама
паспрабуем вызначыцца з “лекам”, неабходным для яе лячэння. Як і ў выпадках з іншымі
духоўнымі хваробамі, у іх выяўленні дапамагае Божае слова, якое як “лямпа” асвятляе
наша сэрца і дазваляе бачыць усё, што ў ім схавана. Можна даверыцца гэтаму святлу
без страху, таму што яно міласэрнае, а не асуджаючае.
“Для чаго даброты чалавеку
сквапнаму?”, - пытаецца аўтар Кнігі Мудрасці Сіраха. Сапраўды, сквапны, які з’яўляецца
ўважлівым захавацелем дабротаў, па-сапраўднаму не ўмее імі карыстацца. Ён іх робіць
“сваімі”, “захоўвае”, але трымае выключна для сябе. Канешне, багацці нам неабходны,
каб праяўляць нашы здольнасці, адчуваць сябе важнымі і сцвярджаць сябе, мець пэўныя
гарантыі, неабходныя ў гэтым нестабільным жыцці. Але трэба быць уважлівым – сквапнасць,
нараджаецца незаўважна, а на яе пачатку заўсёды прысутнічае рацыянальнае меркаванне.
Паступова, мы пачынае ствараць для сябе патрэбы, якіх на самой справе не існуе, перастаем
заўважаць мяжу паміж умеранасцю і сквапнасцю, і, нарэшце, трапляем у палон уласных
скарбаў.
Сквапны чалавек любіць не самаго сябе, а даброты, якія збірае. І таму
з’яўляецца нешчалівым. Без дару немагчыма стварыць умовы для радаснага і поўнага жыцця.
Тым больш немагчыма любіць іншых. Чалавек, заклапочаны толькі захаваннем скарбаў,
паступова становіцца пражэрлівым, маніякальна прагнучым багацця, сумным, адзінокім
і баязлівым. Сквапны бачыць у бліжнім патэнцыйнага рабаўніка і баіцца просьбаў.
Св.
Аўгустын казаў, што “самыя драпежныя жывёлы маюць межы сваіх жаданняў, бо нападаюць
толькі пакуль адчуваюць голад, але калі яны сытыя, пакідаюць здабычу. Сквапнасць –
не насычаецца ніколі”. Вельмі складана сказаць “хопіць” сквапнасці. У Кнізе Эклезіяста
чытаем: “Хто любіць серабро, той не насыціцца серабром, і хто любіць багацце – таму
няма карысці ад яго. І гэта – марнасць! Памнажаецца маёмасць, памнажаюцца і набываючыя
яго; і якая карысць для таго, хто валодае ім: хіба толькі глядзець сваімі вачыма?”
(Экл 5,9).
Сквапны застаецца без бліжніх і такім чынам без радасці. Багаццяў
яму заўсёды недастаткова – заўсёды не хапае чагосьці, каб адчуваць сябе добра. Менавіта
таму Езус кажа не прывязвацца да дабротаў: “Ніхто не можа служыць двум гаспадарам”.
“Не збірайце сабе скарбаў на зямлі, дзе моль і ржа знішчаюць і дзе злодзеі падкопваюцца
і крадуць. Збірайце сабе скарбы ў небе, дзе ні моль, ні ржа не знішчаюць і дзе злодзеі
не падкопваюцца і не крадуць. Бо дзе скарб твой, там будзе і сэрца тваё” (Мц 6,19-21).
Каб
знайсці сродак ад сквапнасці, неабходна пачаць з разважання аб гэтых словах Езуса.
Пан патрабуе маленькай, пакорнай і канкрэтнай дысцыпліны шчодрасці, якая паступова
будзе станавіцца больш глыбокай. Трэба рабіць дабро памятаючы словы св. Паўла: “Мы
нічога не прынеслі ў гэты свет і нічога не вынясем з яго”. Затым апостал кажа: “Калі
маем што есці і чым накрыцца, будзем задаволены гэтым. Жадаючыя абагачацца трапляюць
у спакусу і ў сеткі і ў многія безразважныя і шкодныя пажадлівасці, якія паглыбляюць
людзей у беды і пагібель; бо корань усякага зла – гэта любоў да багацця, паддаўшыся
якой многія адышлі ад веры і самі сябе падверглі многім цярпенням” (1 Цім 6,8-10).
Менавіта
дар, а не захаванне, робяць шчаслівым. Імкненне быць карысным і дапамагаць – гэта
шлях да радасці. Можна практыкавасць шчодрасць не толькі ў вялікіх справах, але таксама
і маленькіх – робячы дабро бліжнім “не са шкадаваннем ці з прымусу, бо радаснага даўцу
любіць Бог”. Шчордая дапамога і ахвяра – гэта шлях да аздараўлення сэрца.