Мы працягваем знаёміцца
з ангельскай літаратурай і сёння ўпершыню ў нашай перадачы мы звернем увагу не на
пісьменніка, а... на пісьменніцу. Па колькасці выданняў яе кнігі займаюць трэцяе месца
пасля Бібліі і Шэкспіра. Нэпэўна няма чалавека, які б не чуў яе імя. Яна – знакамітая
і непаўторная Агата Крысці!
Я не магу гэтага ведаць дакладна, сябры, але мне
здаецца, што некаторыя з вас у гэты момант здзівіліся: як так, якое дачыненне да хрысціянскай
перадачы мае аўтарка дэтэктыўных гісторый!? Аджа, я спадзяюся, што мы хутка пераканаемся
ў тым, што і сама Агата Крысці і яе творчасць маюць да хрысціянства не малое дачыненне.
Агата Мэры Кларыса Малоўэн, пры нараджэнні Мілер, больш вядомая па прозвішчы
першага мужа як Агата Крысці. Яна нарадзілася 15 верасня 1890, а памерла 12 студзеня
1976, пражыўшы поўных 85 лет.
Ахрышчана яна была ў англіканскай царкве. Па
словах Агаты сваім рэлігійным светапоглядам яна абавязана сваёй няні, якая была біблейскай
хрысціянкай. «Яна не хадзіла ў царкву, але чытала Біблію дома. Захоўваць Суботу яна
лічыла святым абавязкам, а ўсялякая мітусня, на яе думку, была смяротным грахом у
вачах Усемагутнага» - з доляй гумару адзначае пісьменніца ў сваёй «Аўтабіяграфіі».
У
пэўны спосаб паўплывала на Агату і маці, якая пэўны час знаходзілася ў рэлігійных
пошуках ды ўрэшце «знайшла супакой» у англіканскай царкве. Каля яе ложка вісеў абраз
св. Францішка, а вядомая кніга Тамаша Кемпійскага «Следам за Хрыстом» («Наследванне
Хрыста») стала яе настольнай кнігай.
Агата Крысці гаворыць, што маці чытала
«Следам за Хрыстом» «у дзень і ў начы», а потым дадае вельмі важныя для нас словы,
што і яна не расстаецца з гэтай кнігай. Бацька пісьменніцы быў вельмі добрым чалавекам
ды таксама быў прыкладам пабожнасці для яе. Кожны вечар ён маліўся, а кожную нядзелю
хадзіў у царкву.
Асаблівае месца ў «Аўтабіяграфіі» Агаты Крысці займае ўспамін
пра пэўную настаўніцу, яка пасярод урока арыфметыкі зусім нечакана зрабіла настаўленне
пра жыццё і веру. Паколькі яно вельмі павучальнае і цікавае, то дазволю сабе пазнаёміць
вас, сябры, з ім цалкам:
- Вы ўсе – сказала яна, - кожная з вас, пройдзе праз
цяжкія выпрабаванні. Калі ў вас не хопіць смеласці супрацьстаяць адчаю, то вы ніколі
не станеце сапраўднымі хрысціянкамі, не даведаецеся, што такое жыццё ў Хрысце. Каб
стаць хрысціянамі, вы павінны смела сустрэць і прыняць жыццё, як сустрэў і пражыў
сваё жыццё Хрыстос; вы павінны радавацца таму, чаму радаваўся Ён; быць такімі ж шчаслівымі,
якім быў Ён у Кане Галілейскай, пазнаць мір і шчасце, якое ёсць у злучэнні з Госпадам
і з Яго воляй. Але вы павінны перажыць, падобна Яму, што значыць застацца аднаму ў
Гефсіманскім садзе, адчуць, што ўсе вашы сябры пакінулі вас, усе, каго вы любілі і
каму верылі, адвярнуліся ад вас, ды сам Госпад Бог пакінуў вас. І тады захавайце веру
ў тое, што гэта яшчэ не канец. Калі вы любіце, то будзеце пакутаваць, а калі не любіце,
то ніколі не даведаецеся, што такое жыццё ў Хрысце.
Канец цытаты... Далей па
тэксту, пісьменніца прызнаецца, што гэтыя некалькі слоў запалі ў яе душу мацней, чым
самыя лепшыя казанні, якія ёй даводзілася чуць. Гэтыя словы вярталіся да яе і прыносілі
надзею ў часы самага глыбокага адчаю. Я ж са свайго боку таксама ў поўным захапленні
ад прамовы невядомай настаўніцы, словы якой прамаўляюць да нас і сёння.
Было
б наіўна з майго боку ўказваць на Агату Крысці, як на ўзор хрысціянскага жыцця, але
зноў жа было б не справедліва не звярнуць увагу на асаблівасці яе творчасці. Вось
жа ніводнага разу тэмай сваіх раманаў яна не зрабіла злачынства на сексуальнай глебе,
ніколі не было нейкіх жорсткіх ці садысцкіх сцэн. У сваёй «Аўтабіяграфіі» яна падкрэслівае:
«Я як і кожны, хто чытае дэтэктывы, была супраць злачынца і за нявінную ахвяру. (...)
Хто мог бы падумаць, што прыйдуць часы, калі кнігі аб злачынствах будуць правакаваць
памкненне да гвалту ды прыносіць садыскае задавальненне апісаннямі жорсткасці дзеля
жорсткасці?»
У творах Агаты Крысці звычайна прысутны хэпі-энд: зло выкрытае
ды пакаранае, сэрцы, што кахаюць – злучаныя, жыццё вяртае сабе страчаную раўнавагу.
Канешне, не заўсёды можна пагадзіцца з разважаннямі пісьменніцы адносна жыцця і смерці,
але гэтыя разважанні правакуюць мысленне і за гэта можна быць ёй удзячнымі. Сама лэдзі
Агата была вельмі ўдзячным чалавекам. Сваю «Аўтабіяграфію» яна скончыла наступнымі
словамі:
Дзіця, калі ўстае з-за стала, гаворыць: «Дзякуй Табе, Госпадзе, за
добры абед». Што сказаць мне ў свае семдзесят пяць? Дзякуй Табе, Госпадзе, за маё
добрае жыццё ды за ўсю тую любоў, якая была мне дадзена ў дар.
На гэтым, сябры,
я развітваюся з вамі. Калі каму-небудзь пасля гэтай перадачы захочацца схапіць томік
старой Агаты, то лепей няхай гэта будзе яе мудрая «Аўтабіяграфія». Вось так... Добрага
вам чытання.