Папа: сэрца, калені, малітва – дазволяць наблізіцца да таямніцы Бога
Сузіранне, блізкасць,
шчодрасць – вакол гэтых трох паняццяў была сканцэнтравана гамілія папы Францішка падчас
ранішняй св. Імшы 22 кастрычніка 2013 г. Яна прайшла, як заўсёды, у капліцы ватыканскага
Дома св. Марты. Пантыфік пацвердзіў, што ніхто не можа зразумець Бога выключна праз
розум і адзначыў, што “выклік Бога” палягае на тым, што ён “умешваецца” у наша жыццё,
каб вылечыць нашы раны, як гэта рабіў Езус. Разважанні Папы былі натхнёны ўрыўкам
з Паслання св. Паўла да Рымлянаў. Касцёл, сказаў Францішак, “калі хоча нам нешта сказаць
аб таямніцы Бога”, выкарыстоўвае толькі слова “цудоўна”. Св. Павел, звярнуў увагу
ён, кажа, што збаўленне і адкупленне можна зразумець толькі на каленях, у сузіранні.
“Так яно і было ў гісторыі Касцёла: сузіранне – інтэлект, сэрца, калені, малітва –
усё разам, дазволіла ўвайсці ў таямніцу”, - сказаў Папа.
“Блізкасць” Бога,
паводле Францішак, палягае на Яго пастаянным знаходжанні побач з чалавекам, нягледзячы
на грэх апошняга. Папа выкарыстаў вобраз медсястры ў шпіталі, якая перавязвае раны,
“адну за другой”. Бог удзельнічае, умешваецца ў нашы пакуты, набліжаецца да нашых
ран і лечыць сваімі рукамі, а для таго, каб мець гэтыя рукі, Ён стаў чалавекам. “Гэта
асабістая справа Езуса”, - падкрэсліў Пантыфік. “Шчодрасць” Бога – гэта багацце Яго
любові і ласкі. Божая любоў заўсёды перамагае, таму што Ён аддаецца чалавеку цалкам,
нягледзячы на яго грэшнасць.
Папа Францішак спаслаўся на “некаторых святых”,
якія казалі, што адным з самых цяжкіх грахоў з’яўляецца недавер да Бога. Але, як чалавек
можа асцерагацца Бога настолькі блізкага і добрага, Які аддае перавагу нашаму грахоўнаму
сэрцу, выказаў недаўменне ён. Гэту таямніцу, зноў сказаў Пантыфік, не так лёгка зразумець,
і ніколі не зразумець выключна праз інтэлект. Тут, паводле яго, могуць дапамагчы толькі
тры рэчы: “сузіранне, блізкасць і шчодрасць.