Դամասկոսի Հայ Կաթողիկէ առաջնորդարանը կրկին ռմբակոծութեան ենթարկուած է
Դամասկոսի Հայ Կաթողիկէ առաջնորդարանը Հոկտեմբեր 15-ի երեկոյեան կրկին հրասանդի հարուածներու
ենթարկուած է: Այս մասին՝ ըստ «Արմէնփրես»-ի՝ տեղեկացուցած է Դամասկոս բնակող Նազարէթ
Էլմաճեանը: Ըստ անոր առաջնորդարանի շէնքը նիւթական վնասներ կրած է: Բարեբախտաբար, մարդկային
վնասներ չկան: Էլմաճեան նաեւ նշած է, որ Հոկտեմբեր 15-ին Դամասկոսի գրեթէ բոլոր թաղամասերու
ուղղութեամբ հրասանդներ ինկած են: «Միայն Ճարամանայի վրայ մօտ 30 հրասանդ ինկած է, բայց
կարծես աստուածային հրաշք ըլլար, ոչ մէկ բնակիչ տուժած է»,- նշած է Էլմաճեան: Ինչպէս
յայտնի է, Հայ Կաթողիկէ առաջնորդարանը ռմբակոծութեան ենթարկուած էր նաեւ Սեպտեմբեր 17-ին:
Շինութեան երկրորդ յարկը նիւթական վնասներ կրած էր, բացի ատկէ, վնասուած էին մերձակայ
«Լոյս» եւ «Փարոս» վարժարանները: Բարեբախտաբար այն ժամանակ նոյնպէս մարդկային վնասներ
չէին եղած: