Апостальская Сталіца атрымала правы на дамен “.catholic”
Святы Пасад атрымаў
ад Сеціўнага таварыства па надаванні імёнаў і нумароў (ICANN ) выключнае права на
дамен “.catholic”. Папская рада па сродках масавай камунікацыі атрымала правы таксама
на гэты дамен у кірылічным , арабскім і кітайскім напісанні. У будучым ён будзе прызнавацца
структурам, якія афіцыйна прадстаўляюць Каталіцкі Касцёл: дыяцэзіям, парафіям, манаскім
кангрэгацыям, каталіцкім універсітэтам, школам і бальніцам. Як заявілі ў Папскай радзе,
гэта павінна паспрыяць, “больш паслядоўнай і больш арганізаванай прысутнасці Касцёла
ў Інтэрнэце”.
Перамовы па іншых “рэлігійных” даменах усё яшчэ вядуцца з Сеціўным
таварыствам. Напрыклад, “.bible” разлічвае атрымаць амерыканскае Біблійнае таварыства.
Арганізацыя абвясціла ў жніўні, што ў выпадку атрымання дамену, мае намер прызнаваць
яго асобам і групам, якія маюць “здаровую павагу да Бібліі”, а рабіць гэта трэба ў
мэтах прадухілення злоўжыванняў.
Заяўка Святога Пасаду на дамен “.catholic”
была адпраўлена ў Сеціўнае таварыства пасля таго, як апошняе ў чэрвені 2011 г. абвясціла
аб самым маштабным пашырэнні прасторы імёнаў “DNS” за ўсю гісторыю. Да гэтага часу
выкарыстоўвалася ўсяго пару дзесяткаў агульных даменных імёнаў верхняга ўзроўню і
некалькі сотняў геаграфічных даменаў .