Paraqitet filmi “Meshtari don Vojtila në Niegoviç”
U paraqit sot në Radio Vatikan filmi “Famullitari don Vojtila në Niegoviç”, shkruar,
drejtuar e prodhuar nga imzot Jarek Çilecki, themelues dhe drejtor i Shërbimit Vatikanas
të Lajmeve. Filmi është një udhëtim në jetën e don Karol Vojtilës, të Lumit Gjon Pali
II, treguar përmes kujtimeve të Eleonora Mardosh, grua tashmë 87-vjeçare, e cila ka
qenë në shërbim të Papës së ardhshëm polak, në famullinë e Niegoviçit. Këtu, Karol
Vojtila u dërgua si zv.famullitar, detyrë që e kreu për një vit, nga korriku i 1948-ës
deri në gusht të 1949-ës. Me sytë e gruas, që i shërbeu, mund të shohim jetën e njeriut,
që shpallet shenjt së shpejti, mendimet dhe ndonjë aspekt të panjohur të punës së
tij të përditshme. Duke qenë edhe gazetar, imzot Jarek Çilecki ka qenë në kontakt
të ngushtë me Papën Vojtila dhe e ka ndjekur nëpër shtegtimet e ndryshme në botë.
Filmi merr shkas nga libri i tij për Atin e Shenjtë, i cili është lexuar e miratuar
nga Gjon Pali II. Xhirimet janë bërë në Poloni, ndërmjet Vadovices, Pierzhovit, Gdovit,
Kalì e Niegoviçit, vende shumë të dashura për të Lumin, që do të shpallet shenjt në
prill të vitit 2014. Disa nga objektet e përdorura në film kanë qenë vërtet të Karol
Vojtilës, si stola dhe këmisha, që protagonisti, Karol Xhuxhek, mban gjatë skenës
së një martese, kremtuar në kishën prej druri të Metkovit. Filmi do të jepet, për
herë të parë për publikun e gjerë, më 4 nëntor, në Teatrin Groteska të Krakovisë. Disa
fjalë për regjizorin: Imzot Jarek Çilecki është lindur më 15 tetor 1966 pikërisht
në famullinë e Niegoviçit, pranë Krakovisë. Pas shkollës së mesme hyri në seminar
në Loxh e u diplomua në Teologji në Akademinë teologjike katolike të Varshavës. U
shugurua meshtar më 1993 e ka shërbyer në Kazakistan, Ukrainë, Rusi e Moskë. Ka punuar
si gazetar për të përjavshmen më të madhe fetare polake “E diela” e ka ngritur televizionin
e parë famullitar në Strikov.