Jemi gjithnjë në kapitullin e parë të Enciklikës Drita e Fesë, që mban titullin: “Besuam
në dashurinë”. Në përmbledhjen e kaluar pamë fillin e fesë në Besëlidhjen e Vjetër
dhe, veçanërisht, nyjëtimin e këtij filli: nga Abrahami tek populli i Hyjit; nga populli
tek Moisiu; nga Moisiu tek populli i zgjedhur. Përvoja vetjake e marrëdhënies me Hyjin
është e shartuar në përvojën e bashkësisë. I vetëm dhe në bashkësi me të tjerët, njeriu
kërkon dritën që shndrit misterin e jetës e të vdekjes. Historia e Besëlidhjes së
Vjetër, megjithatë, merr kuptim plotësisht vetëm në Krishtin. Është e vërtetë se personazhet
e Besëlidhjes së Vjetër nuk besonin në Krishtin, por ata besonin në ardhjen e tij.
Feja hebraike është e orientuar drejt ardhjes së Krishti, ndërsa feja e
krishterë mbështetet në ardhjen e Tij. Jezusi sjell plotësinë e fesë, sepse
“historia e Jezusit është zbulimi i plotë i besueshmërisë së Hyjit”. Fjala e Tij “nuk
është një fjalë ndër shumë të tjera, por Fjala e amshuar” e Hyjit (n. 15). Ajo që
shfaqet në mënyrë bindëse në jetën e Jezusit, është dashuria e Hyjit për njeriun.
Vdekja e Krishtit në kryq është kulmi i kësaj dashurie, prova më e madhe e miqësisë
së tij me të gjithë njerëzit, edhe me armiqtë. Shkruan Papa: “Pikërisht në kundrimin
e vdekjes së Jezusit, feja forcohet e merr një dritë vezulluese, sepse zbulohet si
fe në dashurinë e Tij të palëkundshme për ne, që është e aftë të hyjë brenda vdekjes,
për të na shpëtuar” (n. 16). Vdekja e Jezusit është rrëfimi bindës i dashurisë së
Hyjit dhe ringjallja e Tij është prova më e mirë se Jezusi vetë është i besueshëm:
“Meqë është ringjallur, Krishti është dëshmitar i besueshëm (Vep 1,5); Heb 2,17),
trualli i fortë i fesë sonë” (n.17). Jeta dhe vdekja e Jezusit, sikurse edhe veprat
që bën, kanë vlerë, sepse burojnë prej qenies së tij: Ai është Biri i Hyjit dhe “pikërisht
sepse është Biri i Hyjit, sepse është i rrënjosur në mënyrë absolute në Atin, e ka
mundur vdekjen dhe ka bërë të shkëlqejë drita” (n. 17). Në Jezusin, pra, është Hyji
vetë i pranishëm në jetën e botës. Ky fakt e kundërshton konceptin e gabuar të kulturës
së sotme, e cila “e ka humbur ndjesinë e kësaj pranie konkrete të Hyjit dhe të veprimit
të tij në botë” (n. 17). Sot kujtohet se Hyji është në botën e përtejme e nuk ka lidhje
me jetën konkrete të njerëzve. Një Hyj i tillë nuk do të ishte i fuqishëm dhe “nuk
do të ishte as dashuria e vërtetë, e cila mund të realizojë lumturinë që premton”
(n. 17). Duke qenë se Krishti është i besueshëm, besimi ynë nuk ndalet tek Ai,
por, kur na çon tek ai, bën të mundur një tjetër vështrim mbi botën: “Feja jo vetëm
shikon Jezusin, por edhe shikon nga pikëpamja e Jezusit, me sytë e tij: është pjesëmarrje
në mënyrën e tij të të parit” (n.18). Papa na kujton se në jetën e përditshme
u besojmë njerëzve. Për të ndërtuar një shtëpi i besojmë arkitektit, për një ilaç
i besojmë farmacistit, pastaj avokatit e kështu me radhë, prandaj “kemi nevojë për
dikë që të jetë i besueshëm dhe ekspert në gjërat e Hyjit” (n.18). Ungjilli sipas
Gjonit na kujton se Jezusi na shpjegon Hyjin (Gj 1,18). Të besosh në të do Të thotë
t’i besosh Atij, me fjalë të tjera, ta shohësh botën siç e sheh Ai. Në këtë mënyrë,
feja, jo vetëm që nuk na shkëput nga realiteti, por na bën të hyjmë edhe më thellë
brenda tij, sepse është fe në Krishtin, i cili, duke u mishëruar, e ka përqafuar të
gjithë realitetin. Lidhja me Jezusin me anë të besimit, e shndërron njeriun, i
jep një jetë të re. Jeta e re është dhurata e fesë. Me anë të saj kuptojmë se shpëtimi
nuk vjen si fryt i përpjekjeve tona, por si rrjedhojë e kujdesit të Hyjit, që na ka
dhënë vetveten në Krishtin. Dashuria e Hyjit e mbush zemrën e njeriut, e bën të ngjashëm
me veten dhe e shtyn ta dëshmojë Krishtin si shpëtimtar. “Përjashta këtij njëtrajtësimi
me Dashurinë, përjashta pranisë së Shpirtit që e derdh dashurinë ndër zemra, është
e pamundur ta shpallim Jezusin si Zot (n.21). Lidhja me Jezusin e fut të krishterin
në bashkësi: “Sikurse Krishti përfshin në vetvete të gjithë besimtarët, që formojnë
trupin e tij, i krishteri e kupton vetveten brenda këtij trupi, i lidhur në mënyrë
burimore me Krishtin dhe me vëllezërit në fe” (n. 22), prandaj “feja nuk është fakt
privat, konceptim individualist, opinion subjektiv, por lind nga dëgjesa dhe është
e caktuar për t’u kumtuar e për t’u shpallur” (n. 22).