Papa Fao-s: uria në botë është shkandull; mbi të mund të fitohet me vetëdije solidare
“Uria dhe ushqimi i pamjaftueshëm nuk mund të shikohen si fakt normal: kështu u shpreh
Papa, duke kujtuar emergjencën e ushqimit, një nga sfidat më serioze të njerëzimit.
Ati i Shenjtë e denoncoi individualizmin, kulturën e përjashtimit e të indiferencës
lidhur me këtë problem kaq të mprehtë, në mesazhin drejtuar Fao-s, me rastin e Ditës
botërore të ushqimit, kremtimet e së cilës nisën sot, me parullën: “Njerëz të shëndoshë,
në sisteme të shëndosha ushqimore”. Mesazhin e Atit të Shenjtë në mbledhjen plenare
e lexoi imzot Lugji Travalino, vëzhgues i përhershëm i Selisë së Shenjtë pranë Organizatave
e Organizmave të OKB-së për Ushqimin dhe Bujqësinë (F.A.O., I.F.A.D. dhe P.A.M.) “Janë
shkanduj të vërtetë, uria, ushqimi i keq e i pamjaftueshëm në botë”. Nuk përdor gjysma
fjalësh Papa Françesku, duke kërkuar jo vetëm përgjigjen për emergjencat e menjëhershme,
por edhe përballimin, së bashku, në të gjitha nivelet, të këtij problemi, që rëndon
mbi ndërgjegjen vetjake e shoqërore, për të gjetur, kështu, zgjidhje të drejta e të
qëndrueshme. E bën edhe një thirrje të posaçme: “Askush nuk duhet detyruar të largohet
nga trojet e veta e nga mjedisi i vet kulturor, për shkak të mungesës së mjeteve të
domosdoshme të jetesës”. Papa Françesku reflektoi për paradoksin e një shoqërie
të globalizuar, që i ka të gjitha kushtet për t’i njohur situatat e vështira në botë
e për t’i shumëfishuar shkëmbimet e lidhjet ndërmjet njerëzve, por që, duke pasur
prirjen për t’u mbyllur në guaskën e individualizmit, sillet në mënyrë indiferente,
si në nivelin personal, ashtu edhe në atë institucional e shtetëror, ndaj atij që
vdes nga uria ose vuan, sepse i mungon edhe kafshata e përditshme e bukës thatë, sikur
ky të ishte, pohon Papa Françesku, fakt i pashmangshëm”.
Po uria dhe ushqimi
i pamjaftueshëm nuk mund të shikohen kurrë si fakt normal, të cilin duhet ta pranojmë,
me të cilin duhet të mësohemi, si të ishte pjesë përbërëse e sistemit, pohoi Papa,
e shtoi: “Diçka duhet të ndryshojë në shpirtin tonë, në mendësinë tonë, në shoqëritë
tona”. E, kërkoi së pari, pikërisht, ndryshimin e mendësisë. Kujtoi përsëri kulturën
e përjashtimit e të globalizimit të indiferencës. E më pas vuri theksin mbi atë, që
e quajti “skllavëri e fitimit me çdo kusht” të cilën, nënvizoi, e gjejmë jo vetëm
në marrëdhëniet ndërmjet njerëzve, por edhe në dinamikat ekonomiko-financiare globale.
Vlen për të gjithë rizbulimi i vlerës së solidaritetit, porositi Papa, që nuk duhet
kufizuar në asistencë, por duhet të ngulmojë t’i bëjë njerëzit ekonomikisht të pavarur.
Ati i Shenjtë kërkoi edhe që kjo prirje të jetë themelore në vendimet e nivelit politik,
ekonomik e financiar, në marrëdhëniet ndërmjet njerëzve, popujve e kombeve. Kjo do
të thotë, shpjegoi Papa, ta vësh gjithnjë njeriun dhe dinjitetin e tij në qendër të
vëmendjes, pa e shitur kurrë, me çmim të ultë, në tregun e logjikës së fitimit. Papa
Françesku kujtoi se viti 2014, me nismë të Fao-s, do të jetë Vit ndërkombëtar i familjes
fshatare. Prandaj kërkoi të ndihmohet familja, sepse është bashkësia e parë edukative,
shkolla e parë, që i jep fëmijës mësime të çmuara, duke i kujtuar se duhet të ketë
kujdes për tjetrin, të shikojë të mirën e të gjithëve, ta dojë harmoninë e krijimit
e të kënaqet, kur ndan frytet e gjithësisë, duke mbështetur konsumin e arsyeshëm,
të drejtpeshuar e të qëndrueshëm. Ndihmë e kujdes për familjen, prandaj, për të
ecur kah një shoqëri më e drejtë e më njerëzore. Kujtuam, në fillim, se sot u
kremtua Dita botërore e ushqimit, me veprimari shumë të pasuara, në Romë e në mbarë
botën. Parulla vuri theksin mbi nevojën e krijimit të sistemeve ushqimore të qëndrueshme,
për sigurinë ushqimore dhe plotësimin e nevojave të sistemeve ushqimore. Dita
e ushqimit kremtohet çdo vit, për të përkujtuar pëvjetorin e themelimit të Fao-s,
më 1945. Veprimtaritë, që nisën sot, në orën 10.00, në Romë, me fjalën e hapjes
së Ditës mbajtur nga drejtori i përgjithshëm i Fao-s, Josè Graziano da Silva, do të
vijojnë deri të diel, për të përfunduar me Hanger Run, garë vrapimi prej 10 kilometrash
në rrugët e Romës, gjatë së cilës mblidhen ndihma për njerëzit e uritur: sivjet, për
një projekt kundër urisë në veri të Sudanit.