Լիպիոյ վարչապետը առեւանգուեցաւ ու ազատ արձակուեցաւ
Լիպիոյ վարչապետ Ալի Զէյտան զինեալներու կողմէ առեւանգուելէ եւ ազատելէ ետք «հանդարտութեան»
եւ «ողջամտութեան» կոչ ուղղեց: Ան Լիպիոյ մայրաքաղաք Թրիփոլիի մէջ պանդոկէ մը առեւանգուեցաւ
եւ քանի մը ժամ պատանդ մնաց զինեալներու մօտ: Կառավարութեան պատկերասփռուած նիստին
ընթացքին վարչապետը շնորհակալութիւն յայտնեց անոնց, որոնք զինք ազատեցին` անուղղակի կերպով
ակնարկելով, որ զինք ազատելու համար ապահովական գործողութիւն մը տեղի ունեցած է: Լիպիոյ
Յեղափոխականներու գործողութեանց սենեակ խմբաւորումը յայտարարած էր, որ վարչապետը ձերբակալած
է` հիմնուելով ընդհանուր դատախազին հրամաններուն վրայ, սակայն արդարութեան նախարարութիւնը
հերքեց նման բան: Խմբաւորումը նշեց, թէ իր քայլը Թրիփոլիի մէջ Քայիտայի ղեկավար Անաս
Լիպիի ամերիկեան մասնայատուկ ուժերուն կողմէ ձերբակալուելուն հետ կապ չունի: Պետական
«Լանա» լրատու գործակալութիւնը հաղորդեց, որ վարչապետը առեւանգողները Ոճիրներու դէմ պայքարի
ջոկատն էր: Վարչապետը առեւանգուած էր արշալոյսէն առաջ, Քորինթիա պանդոկին դէմ 100
զինեալներու կողմէ գործուած գործողութեան մը ընթացքին: