Ватыканскі дыпламат: мы будзем дапамагаць бежанцам, нягледзячы на цяжкасці і рызыкі

Пастаянны назіральнік Апостальскай Сталіцы пры Арганізацыі Аб’яднаных Нацый у Нью-Ёрку, арцыбіскуп Фрэнсіс Чулікат лічыць, што дапамога бежанцам з’яўляецца элементарным заданнем Касцёла. Драматычная сітуацыя з бежанцамі на лодцы, якая перавярнулася ў берагоў Лампедузы, з’яўляецца свайго роду сімвалам становішча мільёнаў мігрантаў і бежанцаў ва ўсім свеце, - заявіў прадстаўнік Святога Пасаду ў сувязі з дэбатамі па гэтым пытанні ў ААН.

Тое, якім чынам пра лёс мігрантаў на італьянскім востраве клапоціцца папа Францішак, падкрэслівае, наколькі вялікае значэнне Каталіцкі Касцёл надае дапамозе мігрантам і бежанцам, падкрэсліў арцыбіскуп Чулікат. Ён адзначыў, што многія касцёльныя ўстановы актыўна спрабуюць дапамагчы бежанцам, не таму, што іх папрасілі аб гэтым. Мы рабілі гэта на працягу многіх стагоддзяў і будзем працягваць так паступаць, нягледзячы на ўсе цяжкасці, рызыкі і супраціў.

Некалькі дзён таму недалёка ад італьянскага вострава Лампедуза затанула судна, на якім былі сотні бежанцаў. На сённяшні дзень ратавальнікі знайшлі больш за 300 цел. Пошукі працягваюцца.