Imz. Paglia: “Sinodi i jashtëzakonshëm, shenjë e madhe e dashurisë së Papës për familjen”
“Familja është pasuria më e rëndësishme. Në kohën e sotme, që zmadhon unë-in, duhet
zmadhuar ne-ja, themeli i shoqërive tona”. Kështu u shpreh sot kryetari i Këshillit
Papnor për Familjen, Imz. Vincenzo Pagla gjatë takimit me gazetarët në Sallën e Shtypit
të Vatikanit, me rastin e asamblesë së përgjithshme të dikasterit , që do të zhvillohet
më 23-25 tetor. U paraqit edhe një vëllim me shkrimet e ish-Kardinalit Jorge Mario
Bergoglio mbi temën e familjes dhe të jetës, shkruar gjatë viteve 1999-2013, dhe u
fol për shtegtimin në Romë më 26-27 tetor, rasti i parë zyrtar i takimit të Papës
me familjet e botës. Horizontet e reja antropologjike dhe të drejtat e familjes
do të jenë në qendër të Asamblesë së Përgjithshme të Këshillit Papnor për Familjen.
Mbledhja bëhet edhe më e rëndësishme, për shkak të sinodit të jashtëzakonshëm mbi
familjen, që do të mbahet në Vatikan pas një viti. Për sinodin Imz. Pagla tha se është
një shenjë e madhe e dashurisë së Papës për familjet: “Familja, familjet, janë
pasuria më e rëndërishme e shoqërive tona. Nuk duhet harruar se, në kulmin e javës
së krijimit, Zoti bëri kryeveprën e tij – burrin dhe gruan – që është bashkësi, është
‘ne-ja’, jo ‘unë-i. E sot, pikërisht kur po i jepet rëndësi unë-it, ne mendojmë se
është e domosdoshme t’i japim rëndësi asaj ne-së së jashtëzakonshme, që qëndron në
themel të shoqërive tona”. Pyetjes mbi të divorcuarit e rimartuar Imz. Paglia iu
përgjigj duke theksuar vëmendjen që u kushton Papa këtyre tematikave. Konferenca
për shtyp kishte si qëllim kryesor paraqitjen e tri ditëve mbi familjen. Papa do të
jetë i pranishëm të premten më 23 tetor dhe do të kremtojë liturgjinë e së dielës
paradite. Bie në sy takimi i së shtunës në Domus Pacis, në Romë, ku do të flitet për
aktualitetin e Kartës së të Drejtave të Familjes me rastin e tridhjetvjetorit të botimit.