Եկատէրինպուրկի մէջ պիտի օծուի հայկական նորակառոյց եկեղեցին

Հոկտեմբեր 12-ին Ամենայն Հայոց Կաթողիկոս Գարեգին Բ-ի հանդիսապետութեամբ, մասնակցութեամբ թեմի առաջնորդ Տ. Եզրաս արքեպիսկոպոս Ներսիսեանի ու հոգեւոր դասի պիտի օծուի Եկատէրինպուրկ քաղաքի նորակառոյց հայկական եկեղեցին: Այս մասին կը հաղորդէ armenianchurch.ru-ն:
Արարողութեան ներկայ պիտի ըլլան հոգեւոր եւ աշխարհիկ բարձրաստիճան հիւրեր, հասարակական, ազգային եւ մշակութային գործիչներ` հրաւիրուած Հայաստանի Հանրապետութենէն, ՌԴ այլ քաղաքներէն, բազմաթիւ հաւատաւոր հայորդիներ:
Եկեղեցւոյ հիմքերու օրհնութիւնը կատարուած է 2003-ին` ձեռամբ Ռուսաստանի եւ Նոր Նախիջեւանի Հայոց Թեմի Առաջնորդ Տ. Եզրաս արքեպիսկոպոս Ներսիսեանի:
37 մ. բարձրութեամբ եկեղեցին նախատեսուած է 200 հոգիի համար եւ երեսապատուած է Հայաստանէն տարուած Արմաւիրի կարմիր տուֆով:
Եկեղեցին կառուցուած է Սուերտլովսկի մարզին մէջ գործող «Անի Արմէնիա» շրջանային հասարակական կազմակերպութեան նախագահ Մասիս Նազարեանի բարերարութեամբ: 1996-էն Մասիս Նազարեանը հայ համայնքի նախագահն է: Եկեղեցւոյ ճարտարապետն է Յակոբ Գասպարեանը: Որմնանկարիչը Արտեոմ Մելքոնեանը: