Францішак: Касцёл – як аркестр, у якім розныя інструменты ствараюць гармонію
Касцёл з’яўляецца
каталіцкім, таму што ў ім абвяшчаецца поўня веры, яго пасланне тычыцца ўсіх без выключэння,
і, таму што яго кампаненты здольныя не ўваходзіць у канфлікт, а ўтвараць гармонію,
на падабенства той, якая існуе ў аркестры. На гэтыя тры аспекты звярнуў увагу папа
Францішак падчас агульнай аўдыенцыі на плошчы св. Пятра 9 кастрычніка 2013 г. Сваю
катэхезу ён прысвяціў разважанню над “каталіцкасцю” Касцёла. Пантыфік адзначыў, што
само слова “каталіцкі” паходзіць ад грэцкага “kath’olòn”, што азначае поўню. Паводле
Папы, ужываючы гэта слова ў адносінах да Касцёла, падкрэсліваюцца яго тры фундаментальныя
рысы. Па-першае, Касцёл з’яўляецца каталіцкім, таму што ўяўляе сабой прастору, дом,
у якім абвяшчаецца поўня веры. “У Касцёле кожны з нас знойдзе ўсё неабходнае, каб
верыць, каб жыць па-хрысціянску, каб станавіцца святым, каб крочыць у кожным месцы
і ў кожнай эпосе”.
Папа параўнаў Касцёл з сям’ёй, у якой кожны атрымлівае
ўсё неабходнае для росту, сталення, жыцця. “Нельга ўзрастаць у адзіноце, нельга крочыць
у адзіноце, ізалюючыся”, - сказаў Францішак. Ён падкрэсліў, што менавіта ў Касцёле
слухаем Божае Словае з перакананнем, што гэта пасланне дадзена Богам; у Касцёле сустракаем
Пана ў сакрамэнтах, у Касцёле вучымся жыць супольнасцю, любоўю, якая паходзіць ад
Бога. Францішак заклікаў вернікаў спытаць сябе: як жыву ў Касцёле? Ці прымаю ўсе дары,
якія ён мне дае для росту і сталення?
Другім аспектам каталіцкасці Касцёла
з’яўляецца яго паўсюднасць – ён раскінуты па ўсім свеце і абвяшчае Евангелле кожнаму
чалавеку. “Касцёл гэта не элітарная група, не тычыцца толькі некаторых (…) Адзінства
Касцёла прысутнічае нават у самых малых яго частках. Кожны можа сказаць: у маёй парафіі
прысутны Каталіцкі Касцёл, таму што і яна з’яўляецца часткай Паўсюднага Касцёла, таксама
і яна мае поўню дароў Хрыста, веры, сакрамэнтаў, служэння; яна ў камуніі з біскупам,
з Папам, і адкрыта на ўсіх без выключэння”, - сказаў Святы Айцец.
Францішак
заклікаў вернікаў адчуваць сябе ў адзінстве з усімі каталіцкімі супольнасцямі ў свеце,
малымі і вялікімі, а таксама памятаць, што ўсе супольнасці маюць місію – “мы ўсе павінны
адкрыць нашы дзверы і выйсці для абвяшчэння Евангелля”.
Трэццяя прычына, па
якой Касцёл з’яўляецца каталіцкім – гэта яго адкрытасць на адметнасці. “Касцёл каталіцкі,
таму што з’яўляецца “Домам гармоніі”, у якім адзінтва і адметнасці здольныя злучыцца,
каб быць багаццем”, - сказаў Папа. Ён параўнаў Касцёл з сімфоніяй: яна ўтвараецца
супольным гучаннем розных інструментаў пад кіраўніцтвам аднаго дырыжора. У сімфоніі
не выключаецца гучанне ніводнага з інструментаў, не адмаўляюцца асаблівасці кожнага
з іх, наадварот – гэта максімальна цэніцца.
“Гэта цудоўны вобраз, які кажа
нам, што Касцёл – як вялікі аркестр, у якім існуюць разнастайнасці. (…) Паміж яго
кампанентамі ёсць адментасці, але яны не ўваходзяць у канфлікт, не супрацьстаяць.
Гэта разнастайнасць, якая пераўтвараецца ў гармонію ад Святога Духа. Гэта Ён сапраўдны
“Маэстра”, і Ён сам – Гармонія. (...) І тут спытаем сябе: ці ў нашых супольнасцях
мы жывём гармоніяй? Ці прымаем іншых, прымаем іх, прызнаючы іх адметнасць, (...) або
спрабуем уніфікаваць. Уніфікацыя забівае жыццё (...) Папросім Святога Духа, які з’яўляецца
аўтарам разнастайнасці і гармоніі, каб рабіў нас усё больш “каталіцкімі”!”, - заклікаў
Папа.
На заканчэнне аўдыенцыі, звяртаючыся да пілігрымаў з арабскіх краін,
Францішак нагадаў, што амаль год таму, 10 кастрычніка 2012 г., Бэнэдыкт XVI, падчас
падарожжа ў Ліван, перадаў біскупам Апостальскую адгартацыю “Касцёл на Блізкім Усходзе:
камунія і сведчанне”, і зрабіў арабскую мову адной з моваў агульнай аўдыенцыі, каб
выказаць блізаць да хрысціян блізкаўсходняга рэгіёна. У сувязі з гэтым Папа заклікаў
вернікаў маліцца аб міры ў Сірыі, Егіпце, Ліване і Святой Зямлі.