Երեւանի Մէջ Բացուեցաւ Աստղագիտական Ուղղուածութեան 6-րդ Գիտաժողովը
Աշխարհահռչակ աստղագէտները ՀՀ ԳԱԱ նախագահութեան նիստերու դահլիճին մէջ մասնակցեցան Երեւանի
մէջ իրականացուող 6-րդ աստղագիտական գիտաժողովի բացման: Այս մասին կը յայտնէ Armenpress.am-ը: “Ակտիւ
կալաքթիքական միջուկներու բազմալիքային շրջահայութիւններ եւ ուսումնասիրութիւններ” թեմայով
գիտաժողովին ելոյթ ունեցան ՀՀ ԳԱԱ նախագահ Ռատիկ Մարտիրոսեանը, Բիւրականի աստղադիտարանի
տնօրէն Հայկ Յարութիւնեանը, ՀՀ-ի մէջ Մեծ Բրիտանիոյ դեսպան Ճոնաթան էյուեսը, Միջազգային
աստղագիտական միութեան (ՄԱՄ) 304-րդ միջազգային գիտաժողովի համանախագահներ Արեգ Միքայէլեանը
(Հայաստան) եւ Տէյվիտ Սանտերսը (ԱՄՆ), ինչպէս նաեւ աշխարհահռչակ հայ աստղագէտ Երուանդ
Թերզեանը: Հոկտեմբեր 7-11 Երեւանի մէջ կայանալիք ՄԱՄ գիտաժողովի բացման արարողութեան
կը մասնակցէին նաեւ շարք մը պետական պաշտօնեաներ, դեսպաններ ու անուանի գիտնականներ: Հայ
անուանի աստղագէտ Բենիամին Մարգարեանի 100-ամեակին նուիրուած միջազգային այս գիտաժողովին
մասնակցելու փափաք յայտնած է շուրջ 145 գիտնական աշխարհի աւելի քան 30 երկրէ: Թէեւ մասնակիցներուն
թիւը դեռ կրնայ աւելնալ, սակայն ասիկա արդէն ցուցանիշ կը համարուի Հայաստանի մէջ երբեւէ
իրականացած գիտական ձեռնարկներու ողջ պատմութեան մէջ: Գիտաժողովը նիւթական աջակցութիւն
կը ստանայ ՄԱՄ-ի, ՀՀ ԳԱԱ-ի, ՀՀ ԿԳՆ գիտութեան պետական կոմիտէի, UNESCO-ի, UCOM-ի, UniComp-ի
եւ այլ կառոյցներու կողմէ: Մասնակիցներու թիւը աւելի շատ է աստղագիտութեան մէջ զարգացած
երկիրներէ` ԱՄՆ-էն, Գերմանիայէն, Իտալիայէն, Ֆրանսայէն, Սպանիայէն, Մեծ Բրիտանիայէն,
Ճաբոնէն, Չինաստանէն, Հնդկաստանէն, Քանատայէն, Աւստրալիայէն, Ռուսաստանէն, Ուքրանիայէն
եւ Հայաստանէն: Պիտի ներկայացուին 60 բանաւոր զեկուցում եւ շուրջ 100 փոսթըր: Հայաստանի
մէջ նման գիտաժողովներ իրականացած են 1966, 1986, 1989, 1998 եւ 2001թթ., եւ 2013-ին Գիտաժողովին
համար ստեղծուած է համացանցային պաշտօնական էջ, ուր կարելի է ծանօթանալ մանրամասներուն
եւ օրուան լրատւութեան: