Пантыфік пачаў другі “раўнд” сустрэч з кіраўніцтвам Рымскай курыі

Папа Францішак пачаў другі “раўнд” кансультацый з кіраўнікамі дыкастэрый Рымскай курыі. 7 кастрычніка 2013 г. ён прыняў прэфекта Кангрэгацыі Каталіцкай Адукацыі, кардынала Зянона Грахалеўскага. Пасля ўступлення на Пасад св. Пятра Святы Айцец паслядоўна сустрэўся з кіраўнікамі ўсіх дыкастэрый і правёў з імі індывідуальныя размовы, каб атрымаць агульнае ўяўленне аб іх дзейнасці. Гэтыя кансультацыі ён працягне ў бліжэйшыя месяцы. На мінулым тыдні Святы Айцец сустрэўся з прэфектам Кангрэгацыі Евангелізацыі Народаў, кардыналам Фернанда Філоні. Рэгулярныя штотыднёвыя аўдыенцыі з Папам маюць прэфект Кангрэгацыі Веравучэння, арцыбіскуп Герхард Людвіг Мюлер, і прэфект Кангрэгацыі па справах Біскупаў, кардынал Марк Уэлле.

Паходзячы з Польшчы, кардынал Грахалеўскі кіруе Кангрэгацыяй Каталіцкай Адукацыі з 1999 г. і мае сярод кіраўнікоў ватыканскіх дыкастэрый найбольшы стаж. З пачатку новага пантыфікату, з сярэдзіны сакавіка, ён займае гэту пасаду “часова”. Як і большасць яго калег, ён яшчэ не быў канчаткова зацверджаны папам Францішкам на ёй.

Трэба адзначыць, што гэта звычайныя працэдуры падчас змены Пантыфіка. Зацвярджэнне атрымалі пакуль толькі вышэйузгаданы кардынал Філоні і арцыбіскуп Мюлер. Кардыналу Станіславу Рылцы, старшыні Папскай рады па справах свецкіх, і кардыналу Пітэру Тарксану, старшныні Папскай рады “Iustitia et Pax” Францішак даручыў выконваць свае абавязкі да канца бягучага пяцігадовага тэрміну, на які былі вызначаны паўнамоцтвы членаў і кансультантаў гэтых дыкастэрый. Для Папскай рады па справах свецкіх ён заканчваецца ўжо 31 снежня 2013 г.

З адстаўкай Бэнэдыкта XVI 28 лютага 2013 г. кіраўнікі дыкастэрый Рымскай курыі аўтаматычна страцілі свае пасады. Адразу пасля свайго абрання папа Францішак пацвердзіў паўнамоцтвы ўсіх іерархаў, але гэта носіць часовы характар.