Папа ў Асізі: атмасфера францішканскага братэрства і радасці
4 кастрычніка, на
заканчэнне св. Імшы перад базылікай св. Францішка Папа асвяціў алей і лампаду, якая
будзе ўстаноўлена і запалена побач з магілай асізкага Бедняка. Па-традыцыі кожны год,
гэтыя атрыбуты ахвяруе адзін з рэгіёнаў Італіі – сёлета іх прадставіў рэгіён Умбрыя,
на тэрыторыі якога і знаходзіцца Асізі. Пра прыезд папы Францішка нагадвае атмасфера
на вуліцах гэтага невялікага горада: многія дамы, крамы і аўтамабілі ўпрыгожаны ватыканскімі
сцягамі і выявамі Пантыфіка. Некаторыя ўладальнікі кавярняў змясцілі на дзвярах плакаты
з запрашэннем завітаць на каву, адрасаваным Папе. Тысячы людзей напоўнілі вуліцы горада.
Яны расцягнуліся ўздоўж маршруту Святога Айца, агульная працягласць якога складае
каля 30 км. Сярод пілігрымаў пануе сапраўднае францішканскае братэрства і добры настрой,
які захаваўся і нават умацаваўся, нягледзячы на невялікі дождж, што прайшоў перад
св. Імшой.
Візіт Папы ў Асізі асвятляюць больш за 1000 журналістаў, 53 тэлевізійных
канала з розных краін свету і прадстаўнікі больш чым 70 фотаагенстваў.
Пасля
заканчэння Эўхарыстыі на ўтульнай невялікай плошчы св. Францішка Папа накіраваўся
ў мясцовы цэнтр “Caritas” дзе паабедаў разам з некаторымі беднымі, аб якіх клапоццяца
супрацоўнікі і валанцёры гэтай каталіцкай дабрачыннай арганізацыі. Пасля абеду, ён
здзейсніў прыватны візіт у санктуарый “Eremo delle Carceri”, які размешчаны на вышыні
800 м над узроўнем мора, на схіле гары Субазіо. Менавіта сюды св. Францішак ухадзіў
разам са сваімі братамі, каб пабыць сам на сам з Богам.