Пантыфік на радзіме св. Францішка: укрыжаванне кажа нам пра жыццё
Кульмінацыйным момантам
падарожжа Святога Айца ў Асізі стала Эўхарыстыя на плошчы св. Францішка 4 кастрычніка
2013 г. Па-прыбыцці на яе, Папа накіраваўся ў базыліку, каб памаліцца каля магілы
“Рыцара Панны беднасці”. Паводле Пантыфіка, першае, чаму св. Францішак вучыць нас
сёння – гэта “жывым адносінам з Асобай Езуса”, таму, як “апрануцца ў Яго”, “стаць
падобным на Яго”. Папа нагадаў, што шлях св. Францішка да Езуса пачаўся з таго моманту,
як Хрыстус паглядзеў на яго з крыжа. Ён адзначыў, што гэты крыж захаваўся да сённяшняга
дня і на ім Езус не прадстаўлены памерлым, але жывым – мае адкрытыя вочы. “Кроў сцякае
з Яго ран на руках, нагах і з боку, але гэта кроў выражае жыццё”, - сказаў Пантыфік
і падкрэсліў, што “укрыжаванне не кажа нам пра паразу, упадак: яно парадаксальным
чынам, кажа пра смерць, якая з’яўляецца жыццём, нараджае жыццё, бо кажа нам пра любоў”,
якая перамагае зло і смерць. “Хто дазваляе Укрыжаванаму Езусу глядзець на сябе, той
будзе створаны нанова, стане “новым стварэннем”, - адзначыў Папа і заклікаў прасіць
св. Францішка навучыць заставацца пад позіркам Укрыжаванага.
Другі аспект,
на які звярнуў увагу Папа тычыўся супакою: хто ідзе за Хрыстом, атрымлівае сапраўдны
супакой, які толькі Ён, а не свет можа даць. Пантыфік нагадаў, што св. Францішак часта
асацыіруецца з супакоем, але гэты супакой не з’яўлецца “салодкім сантыментам”. “Калі
ласка: гэтага для св. Францішка не існуе! Таксама як і пэўнага кшталту пантэістычнай
гармоніі з энергіямі космаса. Таксама і гэта не францішканскае, але ідэя, якую нехта
пабудаваў. Супакой св. Францішка, гэта супакой Хрыста, а знаходзіць яго той, хто бярэ
на сябе “цяжар” – гэта значыць Яго запаведзь: Любіце адзін аднаго, як Я палюбіў вас.
Гэты цяжар нельга насіць з высакамернасцю, прэзумцыяй, пыхай, а толькі са сціпласцю
і сардэчнай пакорай”, - сказаў Папа.
Пантыфік нагадаў, што св. Францішак сведчыў
аб павазе да ўсяго, што Бог стварыў, але перш за ўсё аб павазе і любові да кожнага
чалавека. “З гэтага Гораду Супакою, паўтараю з сілай і пакорай у сэрцы: будзем паважаць
стварэнне, не будзем прыладамі разбурэння!”, - сказаў Папа. Ён заклікаў спыніць узброенныя
канфлікты і дазволіць любові заняць месца нянавісці, прабачэнню – нападак, а адзінству
– падзелаў. “Паслухаем вокліч тых, хто плача, пакутуе, гіне з прычыны насілля, тэрарызма
ці вайны, у Святой Зямлі, так любімай св. Францішкам, у Сірыі, на усім Блізкім Усходзе,
у свеце”, - заклікаў Папа.