Кс. Фэдэрыка Ламбардзі
расказаў журналістам пра працу Рады кардыналаў, створанай папай Францішкам для дапамогі
ў кіраванні Паўсюдным Касцёлам і вывучэнні праекту рэфармавання Рымскай курыі. Пасяджэнні
Рады праходзяць у гэтыя дні ў Ватыкане з удзелам Пантыфіка. Першае адбылося 1 кастрычніка
2013 г. у прыватнай бібліятэцы Апостальскага Палацу. Затым, месцам іх правядзення
стаў Дом св. Марты, у якім пражывае Папа, і дзе спыніліся самі іерархі. Пачалася праца
Рады кардыналаў з уводнага звароту Святога Айца. Затым іерархі разважалі на эклезіялагічную
тэматыку у святле рашэнняў ІІ Ватыканскага Сабору. Кс. Ламбардзі падкрэсліў, што мэта
працы Рады заключаецца не толькі ў абмеркаванні арганізацыйных праблем, але тэалагічнага
і духоўнага бачання Касцёла, перспектыў Касцёла, вызначаных на Саборы і спосабаў іх
дасягнення.
Паводле кіраўніка Залы Друку Апостальскай Сталіцы, пурпураты размаўлялі
аб місіі Касцёла, адносінах паміж Паўсюдным Касцёлам і мясцовымі Касцёламі, адзінстве,
калегіяльнасці ў кіраванні Касцёлам. У цэнтры іх увагі была тэма адносін паміж Касцёлам
і беднымі, ролі свецкіх, дабрачынным характары касцёльных супольнасцяў і адказнасці
ўсіх членаў Касцёла за супольнае дабро.
Кс. Ламбардзі адзначыў, што вечарам
1 кастрычніка пурпураты размаўлялі аб будучым Сінодзе Біскупаў і яго магчымай тэме.
Паводле кіраўніка Залы Друку, падкрэслівалася важнасць антрапалагічнай тэматыкі –
асобы і сям’і, аб якой ужо казаў Папа некалькі месяцаў таму.
2 кастрычніка
члены Рады кардыналаў абмяркоўвалі пытанні, звязаныя з рэформай Рымскай курыі: адносін
паміж дыкастэрыямі і Святым Айцом, каардынацыяй дзейнасці паміж дыкастэрыямі, функцыямі
Дзяржсакратарыяту і іншае.
Кс. Ламбардзі ўдакладніў, што члены Рады кардыналаў,
не з’яўляюцца нейкімі “кантынентальнымі дэлегатамі”, але членамі Калегіі Біскупаў,
якія добра ведаюць аб рэальных праблемах Касцёла ў розных частках свету і карыстаюцца
“вялікім даверам і асаблівай павагай з боку Папы”.