Папа заклікаў СМІ да стварэння сапраўднай культуры сустрэчы
30 верасня 2013 г.
была агучана тэма наступнага 48-га Сусветнага дня сродкаў сацыяльнай камунікацыі:
“Камунікацыя на службе сапраўднай культуры сустрэчы”. Тэму дня, які будзе адзначацца
ў Касцёле 1 чэрвеня 2014 г., у нядзелю пасля ўрачыстасці Унебаўшэсця Пана, абраў асабіста
Святы Айцец Францішак. Яна сцісла пераплятаецца з навучаннем Папы і яго частымі на
працягу першых месяцаў пантыфікату заклікамі да стварэння клімату дыялога. Ён неаднойчы
заяўляў, што сучасны чалавек часта жыве ў расчараванні і разгубленасці, выкліканых
крызісам розных сфер жыцця. Нашы сучаснікі, паводле меркавання Пантыфіка, напоўнены
песімізмам, які вядзе да свайго роду ўцёкаў, пошуку прытулку. І тут сродкі масавай
камунікацыі могуць адыграць сваю станоўчую ролю – не раздзяляць і сварыць людзей,
а аб’ядноўваць і прыміраць іх паміж сабой.
Абвяшчэнне тэмы, гэта першы этап
падрыхтоўкі да адзначэння Сусветнага дня сродкаў сацыяльнай камунікацыі. Звычайна,
ва ўспамін св. Францішка Сальскага – апекуна журналістаў і каталіцкай прэсы (24 студзеня),
Папа кіруе адмысловае пасланне, у якім развівае папярэдне абвешчаную тэму.
Раней
арцыбіскуп Клаўдыё Марыя Чэллі заяўляў, што тэма і пасланне Папы на кожны Дзень сродкаў
сацыяльнай камунікацыі з’яўляецца “кампедыумам задач і адказнасці, якія павінны прыняць
працаўнікі СМІ ў наш час бурнага развіцця новых медыя-тэхналогій, якія фактычна ствараюць
новую прастору, новую культуру”. На думку старшыні Папскай рады па сродках масавай
камунікацыі, у пэўным сэнсе Святы Айцец патрабуе ад працаўнікоў мас-медыя глядзець
у глыбіню рэчаў і адправіцца на пошук вечнага і сапраўднага. Іерарх сказаў, што Папа
выказвае давер да магчымасцяў мас-медыя і лічыць, што “СМІ могуць аказаць вялікую
дапамогу ў наладжванні атмасферы дыялогу і даверу”.
Сусветны дзень сродкаў
сацыяльнай камунікацыі ўстанавіў папа Павел VI у адказ на шматлікія просьбы айцоў
ІІ Ватыканскага Сабору прысвяціць адзін дзень у годзе СМІ і іх ролі з каталіцкага
пункту гледжання. Упершыню такі дзень прайшоў 7 мая 1967 г. і Папа выдаў з яго нагоды
спецыяльнае пасланне. Гэты звычай стаў традыцыяй і па сённяшні дзень Каталіцкі Касцёл
адзначае кожны год Сусветны дзень сродкаў сацыяльнай камунікацыі са сваім дэвізам
і адмысловым папскім пасланнем.