Papa: paqja e gëzimi, e jo organizimi, janë shenjë e pranisë së Zotit në Kishë
Jo organizimi e programimi i përsosur, por “gëzimi e paqja” janë shenja e pranisë
së Zotit në Kishë: kështu tha sot Papa Françesku, në meshën e mëngjesit, kremtuar
në Shtëpinë e Shën Martës në Vatikan. Në Ungjillin e Lukës,
dishepujt e Krishtit, entuziastë, bëjnë programe për të ardhmen e Kishës, që sapo
lind, diskutojnë kush është më i madhi ndër ta e u pengojnë të tjerëve të bëjnë mirë,
sepse nuk ishin pjestarë të grupit, që ndiqte Jezusin. Por Biri i Zotit i çudit, duke
ua zhvendosur vëmendjen nga organizimi tek fëmijët. “Kush është më i vogël ndër ju
– u thotë – ai është më i madhi!” Në leximin e parë të liturgjisë së sotme, profeti
Zakaria flet për shenjat e pranisë së Zotit. Ato nuk janë ndonjë organizatë e bukur,
theksoi Papa Françesku, as ndonjë qeverisje e përsosur, por janë të moshuarit nëpër
sheshe e të vegjlit, që luajnë. Ka rrezik që shoqëria t’i mënjanojë pikërisht të moshuarit
e fëmijët, por dënimi i Jezusit për ata, që shkandullojnë të vegjlit, është i fuqishëm: “E
ardhmja e një populli është pikërisht këtu, në të vegjlit e në të moshuarit. Një popull,
që nuk kujdeset për pleqtë e vet e për fëmijët nuk ka të ardhme, sepse nuk do të ketë
as kujtesë e as premtime për t’u plotësuar! Të moshuarit dhe fëmijët janë e ardhmja
e një populli! Sa e lehtë është t’i mënjanojmë, apo jo? Fëmijët i qetësojmë me një
karamele, me një lojë: ‘Shko,shko; luaj, luaj’. E të moshuarit nuk i lëmë të flasin,
nuk i dëgjojmë: ‘Janë pleq, të shkretët…’”. Dishepujt, vazhdoi Papa, nuk e
kuptonin Krishtin, kur u thoshte të bëheshin si fëmijët: “I kuptoj, dishepujt
donin fryte, donin që Kisha të ecte përpara pa probleme e kjo mund të kthehet në tundim
për Kishën: Kisha e funksionalizmit! Kisha e mirëorganizuar! Gjithçka në vendin e
vet, por pa kujtesë e pa premtime! Kështu, Kisha nuk e ka jetën e gjatë: bëhet Kisha
e luftës për pushtet, bëhet Kisha e xhelozive ndërmjet të pagëzuarve e shumë gjëra
të tjera”. Gjallëria në Kishë, theksoi me forcë Papa Françesku, nuk matet me
dokumente e me mbledhje për të planifikuar e për t’i bërë mirë punët. Këto janë të
nevojshme, por nuk janë shenjë e pranisë së Zotit: “Shenja e pranisë së Zotit
është kjo, siç e tha vetë Hyji: ‘Pleq e plaka prapë do të rrinë në sheshe të Jerusalemit:
secili do ta ketë në dorë shkopin për shkak të moshës së thellë! Sheshet e qytetit
do të mbushen plot me meca e me cuca, që do të luajnë nëpër tregjet e tij!’ Loja na
bën të mendojmë për gëzimin: është gëzimi i Zotit. E këta pleq, të ulur, me shkop
në dorë, të qetë, na bëjnë të mendojmë për paqen. Paqe e gëzim: ky është ajri i Kishës!”.