Францішак: “быць” катэхетамі, а не “працаваць” імі
“Катэхізацыя – гэта
стоўп навучання веры, таму нам патрэбны добрыя катэхеты!”, - сказаў папа Францішак,
звяртаючыся да ўдзельнікаў Міжнароднага кангрэса катэхетаў, які 26-28 верасня праходзіць
у Рыме. Пантыфік сустрэўся з удзельнікамі форума – каля 2 тыс. чалавек – на аўдыенцыі
ў Зале Паўла VI у Ватыкане 27 верасня 2013 г. Звяртаючыся да іх, Папа адзначыў, што
вучыць дзяцей, моладзь і дарослых больш ведаць і любіць Хрыста – гэта адна з самых
цудоўных “прыгодаў”. Францішак заклікаў “быць” катэхетамі, а не “працаваць” імі, таму
што “быць”, азначае уключыць у гэту справу ўсё сваё жыццё. “Да сустэчы з Езусам трэба
весці і словамі, і сведчаннем”, - сказаў Папа і дадаў, што катэхеты павінны моцна
любіць Хрыста і Яго народ.
У сувязі з гэтым Пантыфік заклікаў сабраных быць
бліжэй да Езуса – кожны паводле ўласнага паклікання, формы духоўнасці і магчымасцяў.
Важна “быць” з Панам, адзначыў Папа. Таксама, паводле Святога Айца, неабходна ісці
за Хрыстом – наследаваць Яго паводзіны, выходзіць па-за саміх сябе і ісці на сустрэчу
з іншымі. Ён падкрэсліў, што ў веры, чым больш мы яднаемся з Хрыстом, тым больш Ён
дазваляе нам выходзіць па-за нашы рамкі. “Дзе ёсць сапраўднае жыццё ў Хрысце, там
ёсць адкрытасць на іншага”, - сказаў Папа.
На думку Пантыфіка, катэхеты павінны
не баяцца ісці разам з Хрыстом на перыферыі. “Калі катэхет дазваляе страху авалодаць
сабой – становіцца баязліўцам; калі катэхет заўсёды прабывае ў спакоі – пераўтвараецца
ў музейную статую; калі катэхет жорсткі – становіцца ссохлым і бесплённым”, - сказаў
Папа. Ён заклікаў катэхетаў памятаць, што Хрыстус паабяцаў быць заўсёды са сваімі
вучнямі.