Іерархі, палітыкі і дыпламаты будуць размаўляць пра энцыкліку “Pacem in terris”
2-4 кастрычніка ў
Рыме, па ініцыятыве Папскай рады “Iustitia et pax”, пройдуць мерапрыемствы з нагоды
50-годдзя энцыклікі Яна XXIII “Pacem in terris” (Мір на зямлі), апублікаванай 11 красавіка
1963 г., у самы напружаны момант халоднай вайны паміж ЗША і СССР. Узгадаць аб каштоўнасці
дакумента, з якім у тым кантэксце выступіў Пантыфік, на адмысловай канферэнцыі збяруцца
высокія касцёльныя іерархі, палітыкі, дыпламаты, прадстаўнікі міжнародных арганізацый,
грамадскія дзеячы і навукоўцы. Сярод іх, старшыня Папскай рады “Iustitia et pax” кардынал
Пітэр Тарскан, прэфект Кангрэгацыі Каталіцкай Адукацыі кардынал Зянон Грахалеўскі,
генеральны дырэктар ЮНЕСКА Ірына Бокава і многія іншыя.
На працягу трох дзён
канферэнцыі яе ўдзельнікі будуць размаўляць пра важнасць адукацыі каталіцкай моладзі
да яе ўдзелу ў палітыцы, актуальнасць энцыклікі “Pacem in terris” і новыя выклікі,
якія сёння стаяць перад светам. 3 кастрычніка з удзельнікамі форума сустрэнецца папа
Францішак. Ён прыме іх на аўдыенцыі ў Клеменційскай Зале Апостальскага палацу.
Паводле
кардынала Тарксана, аднаго з арганізатараў канферэнцыі, падчас яе будзе таксама разгледжана
тэма рэфармавання ААН і ў прыватнасці Савета Бяспекі, праблема міру ў святле адукацыі,
навукі і культуры. Акрамя таго, на форуме выступяць прадстаўнікі рэгіянальных арганізацый:
Савета Еўропы, Афрыканскага саюза, Лігі Арабскіх Дзяржаў, Арганізацыі Амерыканскіх
Дзяржаў і арганізацыі “Дыялог па супрацоўніцтву ў Азіі”.