Egjipt: në Delga, pas sulmeve islamike, kremtohet meshë përsëri
Të krishterët koptë të provincës së Minjës “rimarrin” ndërtesat e kultit, pas një
muaji sulmesh islamiste dhe detyrimit për të paguar taksën e të “pafeve”. Dje pasdite
mijëra vetë kanë marrë pjesë në Meshën e parë të kremtuar në Kishën e Virgjërës Mari,
tek rrënojat e manastirit të Anba Abraam-it në Delga (Minja, Egjipti i Epërm). Kremtimi
i së dielës është i pari që prej 14 gushtit, dita e sulmit islamist kundër koptëve.
Ndërtesa murgare zë fill në shekullin IV dhe është rrënuar nga Vëllazëria Myslimane.
Shërbesën e kanë kryesuar Atë Abram Teneissa e Atë Silwanis Lutfi, dy priftërinj
koptë ortodoksë, që më shumë se një herë u kanë bërë ballë ekstremistëve duke u lutur
në anijatat e kishave të shkatërruara dhe duke ndihmuar familjet e dëbuara. Burimet
vendore të mbledhura nga angjensia AsiaNews tregojnë se Mesha e djeshme ka bashkuar
edhe qindra familje të arratisura nga Delga për shkak të përndjekjeve. Ato janë kthyer
jo vetëm për t’u lutur në kishat e tyre, por edhe për të rindërtuar banesat e veta,
duke sfiduar ndalim-qarkullimin ushtarak dhe kërcënimin e ekstremistëve. Fshati i
Delgës, çerdhe e luftëtarëve islamistë, i rimarrë nga ushtria më 18 shtator, është
bërë i famshëm në Egjipt prej përndjekjeve të dhunshme ndaj bashkësisë së krishterë
të atyshme, që ka pësuar dhunime të njëpasnjëshme për javë të tëra. Janë shkatërruar
62 ndërtesa kulti e banimi, janë rrëmbyer njerëz, janë bërë vrasje në masë dhe është
vënë jaza, taksa që të pafetë duhet t’i paguajnë bashkësisë myslimane për të shpëtuar
jetën.