Մեծի Տանն Կիլիկիոյ Կաթողիկոսութեան Կրօնական Ժողովը Կ՛ողջունէ Հայ Եկեղեցւոյ Եպիսկոպոսաց
Ժողովը
Երկուշաբթի, 16 սեպտեմբեր 2013-ի երեկոյեան, Պիքֆայայի վանքին մէջ Արամ Ա. կաթողիկոսի
նախագահութեամբ տեղի ունեցաւ Մեծի Տանն Կիլիկիոյ կաթողիկոսութեան Ազգային կեդրոնական
վարչութեան Կրօնական ժողովի նիստը: Ժողովի ընթացքին նախ վաւերացուեցաւ Կրօնական ժողովի
յառաջիկայ տարիներու աշխատանքի ուղեգիծը, ուր յատուկ կերպով կը շեշտուէր կրօնական դաստիարակութեան
ու կաթողիկոսարանի Երիտասարդաց բաժանմունքի աշխատանքները վերակազմակերպելու հրամայականը:
Բնականաբար յիշեալ ուղեգիծը նաեւ կ՛անդրադառնար միջեկեղեցական եւ միջկրօնական յարաբերութեանց,
դպրեվանքի առաքելութեան եւ այլ կարեւոր մարզերու: Յիշեալ նիստի ընթացքին նաեւ զեկուցում
տրուեցաւ յառաջիկայ շաբաթ Ս. Էջմիածինի մէջ երկու վեհափառ հայրապետներուն ներկայութեամբ
եւ օրհնութեամբ տեղի ունենալիք հայ եկեղեցւոյ Եպիսկոպոսական ժողովին մասին: Կարեւորութեամբ
շեշտուեցաւ յիշեալ ժողովին կատարելիք աշխատանքներուն հրամայական անհրաժեշտութիւնը մեր
եկեղեցւոյ առաքելութեան համար: Յայտնենք, որ Եպիսկոպոսաց ժողովը այս առաջին հանդիպման
ընթացքին պիտի քննէ հայ եկեղեցւոյ մկրտութեան կարգը, ինչպէս նաեւ Հայոց ցեղասպանութեան
նահատակներու սրբադասումը: Ժողովը իր աշխատանքներուն պիտի սկսի երեքշաբթի, 24 սեպտեմբեր
2013-ի առաւօտեան եւ պիտի աւարտի ուրբաթ, 27 սեպտեմբերին: