Thirrje e re e Papës: tragjedia në Siri mund të zgjidhet vetëm me dialog, duke respektuar
drejtësinë
Papa Françesku e ngriti sot sërish zërin për paqen në botë, në audiencën e përgjithshme,
në Sheshin e Shën Pjetrit, para 80 mijë besimtarëve. Më 21 shtator, kujtoi Ati i Shenjtë,
si çdo vit, Kombet e Bashkuara kremtojnë Ditën Ndërkombëtare për Paqen e Këshilli
Ekumenik i Kishave u ka kërkuar të gjithë anëtarëve të vet të luten për paqen, sidomos
atë ditë. Duke i bërë jehonë kësaj kërkese, edhe vetë Papa tha: “I ftoj katolikët
e gjithë botës të bashkohen me të krishterët e tjerë për të vazhduar t’i përgjërohemi
Zotit për dhuratën e paqes në vendet më të trazuara të planetit. Paqja, dhuratë e
Jezusit, banoftë gjithnjë në zemrat tona e ndihmoftë qëllimet e veprimet e përgjegjësve
të kombeve e të të gjithë njerëzve vullnetmirë”. Ati i Shenjtë bëri thirrje
për inkurajimin e përpjekjeve, që synojnë zgjidhje diplomatike e politike për shuarjen
e vatrave të luftës, të cilat akoma shqetësojnë njerëzimin: “Mendimi im shkon
veçanërisht tek popullsia e dashur siriane, tragjedia njerëzore e së cilës mund të
zgjidhet vetëm me dialog e bisedime, duke respektuar drejtësinë dhe dinjitetin e secilit,
sidomos të më të brishtëve e më të pambrojturve”. Gjendjen e vështirë në Lindjen
e Mesme, Papa Françesku e përmendi edhe në përshëndetjen për besimtarët e gjuhës arabe,
duke u folur veçanërisht ipeshkvijve të Kishës latine të Tokës Shenjte, të Sirisë,
Jordanisë, Irakut, Libanit e vendeve të Gjirit Persik, që sot ishin të pranishëm në
Sheshin e Shën Pjetrit, pasi këto ditë po zhvillojnë konferencën e tyre ipeshkvnore
në Romë: “Ashtu si nëna di të kërkojë e të trokasë në çdo derë për bijtë e vet,
pa bërë llogari, por me dashuri, ashtu edhe Kisha: përmes lutjes, ajo i lë në dorë
të Zotit të gjitha situatat e bijve të vet. Besojmë gjithnjë në forcën e lutjes së
saj, sepse Zoti nuk është i pandjeshëm ndaj thirrjeve të Kishës së Vet!”