Լաւրով. «Մոսկուա Եւ Ուաշինկթըն ՄԱԿ-ի Մէջ
Պիտի Պատրաստեն Սուրիոյ Քիմիական
Զէնքերուն
Վերաբերեալ Բանաձեւ Մը»
Ռուսիոյ արտաքին գործոց նախարար Սերկէյ Լաւրով յայտնեց, որ Ժընեւի փաստաթուղթը կը նշէ,
որ Ապահովութեան խորհուրդը ռուս- ամերիկեան նախաձեռնութիւնը պիտի որդեգրէ` յայտնելով,
որ Մոսկուա եւ Ուաշինկթըն ՄԱԿ-ի մէջ պիտի պատրաստեն Սուրիոյ քիմիական զէնքերու գտնուած
վայրերը ճշդելու բանաձեւ մը: Լաւրով զգուշացուց, որ Ապահովութեան խորհուրդին մէջ որեւէ
բանաձեւ, որ Սուրիոյ դէմ սպառնալիքներ կը բովանդակէ, կրնայ ձախողութեան մատնել Ժընեւի
մէջ սուրիական քիմիական զէնքերուն շուրջ Ուաշինկթընի հետ գոյացած համաձայնութիւնը: Ան
յայտնեց, որ «ես վստահ եմ, որ հակառակ կարգ մը եւրոպական մայրաքաղաքներէն հնչող յայտարարութեանց,
ամերիկեան կողմը յանձնառու պիտի մնայ գոյացած համաձայնութեան ճշգրիտ գործադրութեան»:Ան ողջունեց «Ժընեւ-2» խորհրդաժողովի գումարումը եւ սուրիական ընդդիմադիր Ազգային համաձայնական մարմինի բոլոր ղեկավարներուն կոչ ուղղեց քաղաքական լուծումի մը հասնելու համար երկխօսութեան մասնակցելու` շեշտելով, որ սուրիական ընդդիմութիւնը բանակցութեան նստիլ համոզելու եւ ստիպելու ժամանակը հասած է:
Լաւրով պատրաստակամութիւն յայտնեց Մոսկուայի մէջ սուրիական ընդդիմութեան բոլոր հատուածներուն հետ հանդիպելով ամէն բան քննարկելու` նշելով, որ «ոմանք չհասկցան Միացեալ Նահանգներու արտաքին գործոց նախարար Ճոն Քերրիի հետ մեր ձեռք բերածը, իսկ 7-րդ յօդուածը հիմա սեղանի վրայ չէ»:
| All the contents on this site are copyrighted ©. |