Ватыканскі іерарх: выкарыстоўваць атам у мірных мэтах
Выкарыстоўваць атам
у мірных, а не вайсковых мэтах. З такім заклікам звярнуўся да міжнароднай супольнасці
арцыбіскуп Дамінік Мамбэрці. Прадстаўнік Апостальскай Сталіцы прымае ўдзел у 57-й
сесіі генеральнай канферэнцыі Міжнароднага агенцтва па атамнай энергетыцы (МАГАТЭ),
якая 16-21 верасня праходзіць у Вене. Паводле іерарха, атамная зброя не павінна сёння
быць гарантыяй міру на планеце і варта даць новы імпульс працэсу атамнага разбраення.
Арцыбіскуп
Мамбэрці выказаў “глыбокую заклапочанасць Апостальскай Сталіцы з-за нядаўніх трагічных
падзей на Блізкім Усходзе”. Ён пацвердзіў рашучую падтрымку Апостальскай Сталіцы намаганням
па стварэнні ў гэтым рэгіёне зон, свабодных ад атамнай зброі і ад усіх відаў зброі
масавага знішчэння. “Зоны свабодныя ад атамнай зброі з’яўляюцца лепшым прыкладам даверу
і бяспекі і пацвярджэннем таго, што мір і бяспека магчымыя без валодання атамнай зброяй”,-
сказаў ватыканскі іерарх.
Арцыбіскуп Мамбэрці звярнуў увагу на перамовы,
якія вядуцца адносна атамнай праграмы ў Іране. Апостальская Сталіца пераканана, што
“цяперашнія цяжкасці могуць і павінны быць пераадолены шляхам дыпламатычных каналаў,
праз выкарыстанне ўсіх сродкаў, якія знаходзяцца ў распараджэнні дыпламатыі”, каб
такім чынам пераадолець бар’еры, якія “перашкаджаюць ўзаемнаму даверу”.