Համամիութենական Միջազգային Համաժողով Պոզէի Վանական Համալիրում։

Սեպտեմբերի 3-7-ը Իտալիայի Պոզէ վանական համալիրում տեղի ունեցաւ ուղղափառ հոգեկանութեանը նուիրուած «Հոգեւոր կեանքի շրջափուլերը» խորագրով 21-րդ համամիութենական միջազգային կոնֆերանսը, որին ներկայ էին 200-ից աւել աշխարհականներ եւ հոգեւորականներ Ուղղափառ, Արեւելեան Ուղղափառ եւ Կաթողիկէ Եկեղեցիներից, տարբեր վանքերից եւ քրիստոնէական կազմակերպութիւններից: Կոնֆերանսին մասնակցում էր Մայր Աթոռի Միջեկեղեցական յարաբերութիւնների ծիսահայեցակարգային հարցերի գրասենեակի պատասխանատու Զաքարիա վարդապետ Բաղումեանը, որը ներկաներին փոխանցեց Գարեգին Բ. պատգամը. «Անհնար է պատկերացնել մարդու կեանքն առանց Արարչի հետ հաղորդակցութեան, որն իմաստաւորւում է կենդանի գործերով եւ հաւատքի կեանքով: Չնայած Ս. Մկրտութեամբ սկիզբ առնող հոգեւոր կեանքը լի է բազում փորձութիւններով, բայց Տիրոջ օգնականութեամբ յաղթահարելի է ամէն ինչ, երբ աներեր հաւատ, յոյս եւ սէր կայ հանդէպ մեր Տէրը, ով աշխարհ եկաւ մարդկութեան փրկութեան համար` ցոյց տալով երկինք տանող ճանապարհը: Նրան հետեւեցին, Նրանով գօտեպնդուեցին եւ Նրանով զօրացան իրենց հաւատքի եւ հոգեւոր փորձառութեան մէջ նաեւ Եկեղեցու Ս. Հայրերը` հոգեշահ գրուածքներով կրթելով մարդկանց հոգիներն ու մտքերը»,- ասւում է Հայոց Հայրապետի ուղերձում:
Կոնֆերանսի ընթացքում Տ. Զաքարիա վարդապետ Բաղումեանն առանձին հանդիպում ունեցաւ Բոզէի վանքի հիմնադիր եւ կոնֆերանսի կազմակերպիչ Էնցոյ Բիանկիի հետ: Հանդիպման ժամանակ անդրադարձ կատարուեց Մայր Աթոռի եւ վանական համալիրի միջեւ ձեւաւորուած ջերմ յարաբերութիւններին եւ յետագայ համագործակցութեան ծրագրերին:
Համամիութենական միջազգային կոնֆերանսի ժամանակ Ս. Գրքի եւ հայրախօսական ժառանգութեան լոյսի ներքոյ բանախօսներն անդրադարձան հոգեւոր կեանքի առանձնայատկութիւններին եւ արդի մարտահրաւէրներին, մասնակիցները նաեւ աղօթեցին Մերձաւոր Արեւելքում եւ յատկապէս Սիրայում խաղաղութեան հաստատման եւ ամրապնդման համար: