Dashuri për popullin e përvuajtëri, virtyte të nevojshme për kë qeveris: kështu Papa
Françesku në Shtëpinë e Shën Martës
Përvuajtëria dhe dashuria janë karakteristika të domosdoshme për qeveritarët; qytetarët,
sidomos nëse janë katolikë, nuk mund të mos tregojnë interes për politikën: veçuam
vetëm dy ide nga homelia e meshës së mëngjesit, që Papa Françesku e kremtoi, si zakonisht,
në Shtëpinë e Shën Martës në Vatikan. Ati i Shenjtë i ftoi besimtarët të luten për
autoritetet. Në Ungjillin e sotëm, centurioni i kërkon me përvuajtëri e besim
Jezusit shërimin e shërbëtorit të vet, ndërsa në Letrën e Shën Palit drejtuar Timoteut
gjejmë ftesën për t’u lutur për qeveritarët. Kjo i dha shkas Atit të Shenjtë të reflektojë
për mënyrën e përdorimit të autoritetit, si shërbim. Ata, që qeverisin, pohoi Papa
Françesku, duhet ta duan popullin e tyre, sepse nëse kjo nuk ndodh, një politikan
mund të vendosë thjesht rregull e disiplinë, por jo të qeverisë. Ati i Shenjtë mori
shembullin e Davidit Mbret, i cili e donte kaq shumë popullin e vet saqë, pas mëkatit
të regjistrimit të popullsisë, i kërkoi Zotit ta dënonte atë e jo njerëzit e tij.
Prandaj, tha Papa Bergolio, qeveritarët duhet të kenë këto dy virtyte: dashurinë për
popullin dhe përvuajtërinë: “Nuk mund të qeveriset një vend pa dashuri për
popullin e pa përvuajtëri! Çdo burrë e çdo grua, që merr përsipër të shërbejë në qeveri,
duhet t’i bëjë vetes këto dy pyetje: ‘A e dua popullin tim, për t’i shërbyer më mirë?
A jam i përvuajtur, a i dëgjoj të tjerët, opinionet e ndryshme, për të zgjedhur rrugën
më të mirë?’. Nëse nuk i bën vetes këto pyetje, qeverisja nuk do të jetë e mirë. Qeveritari,
burrë a grua, që e do popullin e vet, është burrë o grua e përvuajtur”. Nga
ana tjetër, Shën Pali Apostull i këshillon të gjithë të luten për ata, që kanë pushtet,
që të bëjnë jetë të qetë, në shërbim të popullit. Nga ana e tyre, qytetarët nuk mund
të mos interesohen për politikën, theksoi Ati i Shenjtë: “Askush nuk mund të
thotë: ‘Unë nuk kam të bëj me këtë, qeverisin të tjerët…’. Jo, jo, unë jam përgjegjës
për qeverisjen e tyre e duhet të bëj ç’është e mundur që të qeverisin mirë e duhet
të bëj ç’kam në dorë, duke marrë pjesë në politikë, ashtu si mundem. Politika – thotë
Doktrina Shoqërore e Kishës – është një nga format më të larta të bamirësisë, sepse
është shërbim për të mirën e përbashkët. E unë nuk mund të laj duart, eh? Të gjithë
duhet të bëjmë diçka!” E kemi zakon, vazhdoi Papa Françesku, të flasim vetëm
keq për qeveritarët e të vemë më dukje vetëm gjërat që s’shkojnë. I dëgjojmë lajmet
në televizion, e s’bëjnë tjetër veçse dru e dru e dru; lexon gazetën, edhe aty dru…
gjithnjë keq, gjithnjë kundër! Ndoshta, vazhdoi Ati i Shenjtë, qeveritari është mëkatar,
ashtu siç ishte edhe Davidi mbret, por unë duhet të bashkëpunoj me të, me opinionin
tim, me fjalë, me këshilla, sepse e mira është e përbashkët e të gjithë duhet të kontribuojmë
për të. E katoliku i vërtetë përzihet në politikë, theksoi Papa: “Katoliku
i mirë përzihet në politikë, duke ofruar ç’ka më të mirë, që qeveritari të mund të
qeverisë. Por cila është gjëja më e mirë, që ne mund t’u japim qeveritarëve? Lutjen!
Ashtu thotë edhe Shën Pali Apostull: ‘Lutje për të gjithë njerëzit e për mbretin e
për të gjithë ata, që janë në pushtet’. ‘Por, o Atë, filani është njeri i keq, duhet
të shkojë në ferr…’. ‘Lutu për të, lutu që të qeverisë mirë, që ta dojë popullin e
vet, që t’i shërbejë atij, që të jetë i përvuajtur!’ I krishteri, që nuk lutet për
qeveritarët, nuk është i krishterë i mirë! ‘Por, o Atë, si të lutem për këtë? Ky është
njeri që s’shkon…’. ‘Lutu që ta ndryshojë zemrën!’ Lutu! E nuk e them unë këtë, e
thotë Shën Pali, është Fjala e Zotit”.