Papa: thashethemet janë kriminale, sepse vrasin Zotin dhe të afërmin
Kush flet keq për tjetrin është hipokrit dhe nuk ka guxim të shohë mangësitë e veta.
Në meshën e mëngjesit, Papa Françesku e ngriti sot zërin kundër llafeve, kundër fjalëve
të këqia e thashethemeve, që kanë një përmasë kriminaliteti, sepse sa herë flasim
keq për vëllezërit tanë, tha ai, imitojmë gjestin vëllavrasës të Kainit. “Pse e
shikon lëmizhden në sy të vëllait e nuk e sheh traun në syrin tënd?” Ati i Shenjtë
u nis nga kjo pyetje e Jezusit në Ungjillin sipas Lukës, që i flet ndërgjegjes së
çdo njeriu, në të gjitha kohrat. Pasi nënvizon përvuajtërinë, Jezusi përmend të kundërtën
e saj, atë sjellje të urryer ndaj të afërmit, për të cilën bëhemi gjykatës të vëllezërve
tanë. E këtu, tha Papa, Jezusi përdor një fjalë të fuqishme: hipokrit: “Ata
që jetojnë duke gjykuar të afërmin, duke folur keq për të afërmin, janë hipokritë,
sepse nuk kanë forcë, nuk kanë guxim të shohin mangësitë e veta. Për këtë, Zoti nuk
thotë shumë fjalë. Më pas, thotë se ai, që ka urrejtje kundër vëllait në zemër, është
vrasës… Edhe Shën Gjoni Apostull, në Letrën e tij të parë, e thotë qartë: ai që e
urren vëllain e vet, ecën në errësirë; kush e gjykon vëllain e vet, ecën në errësirë”. E
kur i gjykojmë vëllezërit, edhe sikur mendimin tonë ta mbajmë mbyllur në zemër, e
kur flasim keq për ta me të tjerët, bëhemi të krishterë vëllavrasës, theksoi Ati i
Shenjtë: “Një i krishterë vrasës… Nuk e them unë këtë, e thotë Zoti. E këtu,
s’ka vend për lojra. Nëse flet keq për vëllain tënd, e vret. E ne, sa herë bëjmë kështu,
imitojmë gjestin e Kainit, vrasësit të parë të historisë”. Në këtë kohë, shtoi
Papa Françesku, kur flitet shumë për luftë e kur kërkohet paqja, duhet t’i kthejmë
sytë nga Zoti e jo nga Kaini. “Thashethemet – paralajmëroi Ati i Shenjtë – shkojnë
gjithnjë drejt përmasës së kriminalitetit. Nuk ka thashetheme të pafajshme”. Gjuha,
tha Papa duke cituar shën Jakobin Apostull, është për të lëvduar Zotin, por kur e
përdorim për të folur keq për vëllain, ose motrën tonë, e vrasim Hyjin”, pasi vrasim
imazhin e Zotit në vëllain tonë. Ndokush mund të thotë se filani i meriton thashethemet,
vazhdoi Papa Bergolio. Por s’mund të jetë gjithmonë kështu: “Shko, lutu për
të! Bëj pendesë për të! E pastaj, nëse është e nevojshme, fol me atë person, i cili
mund të ndryshojë. Por mos ua thuaj të gjithëve! Shën Pali ishte mëkatar i madh e
thoshte për vetveten: ‘Më parë qeshë blasfemues, salvues dhe arrogant. Por gjeta mëshirë’.
Ndoshta askush prej nesh nuk blasfemon – ndoshta. Por nëse ndokush bën thashetheme,
sigurisht që është salvues dhe arrogant. T’i lutemi Zotit për ne, për krejt Kishën,
që të na japë hirin e kthimit nga kriminaliteti i thashethemeve në dashurinë, në përvuajtërinë,
në butësinë, në zemërgjerësinë e në shpirtmadhësinë ndaj të afërmit”.