Տեղի ունեցաւ Գեւորգեան հոգեւոր ճեմարանի 2013-2014 թթ. ուսումնական տարուայ բացման
արարողութիւնը
Սեպտեմբերի 9-ին տեղի ունեցաւ Մայր Աթոռ Սուրբ Էջմիածնի Գեւորգեան հոգեւոր ճեմարանի (Աստուածաբանական
համալսարան) 2013-2014 թթ. ուսումնական տարուայ բացման արարողութիւնը` հանդիսապետութեամբ
Գարեգին Բ Ամենայն Հայոց Կաթողիկոսի եւ մասնակցութեամբ Մայր Աթոռի միաբանների, Ճեմարանի
դասախօսական կազմի ու սաների: Գեւորգեան հոգեւոր ճեմարանի տեսուչ Գեւորգ եպիսկոպոս
Սարոյեանը իր խօսքում նշեց, որ նոր ուսումնական տարեշրջանը նաեւ յոբելեանական նշանակութիւն
ունի հոգեւոր կրթական հաստատութեան համար. 2014 թ. լրանում է Գեւորգեան ճեմարանի հիմնադրման
140-րդ տարին: Այս առնչութեամբ Սրբազանը տեղեկացրեց, որ նոր տարուայ գործունէութիւնն
ամբողջապէս միտուած է լինելու ըստ պատշաճի արժեւորելու ճեմարանի անցած հարուստ ստեղծագործական
ուղին, նրա ժառանգութիւնն ու ծանրակշիռ ազդեցութիւնը հայ կեանքի վերջին հարիւրամեակի
վրայ: Վերջում Վեհափառ Հայրապետն իր օրհնութիւնն ու գնահատանքը բերեց ճեմարանի տեսչութեանը
եւ դասախօսներին անձնուէր աշխատանքի համար` համոզում յայտնելով, որ մշակուած նոր կրթական
ծրագրերն աւելի զօրեղ պիտի դարձնեն հոգեւոր հաստատութիւնը` որպէս գիտելիքի եւ հոգեւոր
նկարագրի կերտման դարբնոց: