Թուրքիոյ Մէջ Ոստիկանութիւն Եւ Ցուցարարներու Միջեւ Բախումներ
ԱՆԳԱՐԱ, «Ա.Էֆ.Փէ.».- Թրքական լրատուամիջոցներ Երեքշաբթի, Սեպտեմբեր 10ին հաղորդեցին,
թէ ոստիկանութեան հետ Անթաքիոյ մէջ տեղի ունեցած բախումներուն ընթացքին, Երկուշաբթի օր
վիրաւորուած 22ամեայ թուրք ցուցարար մը սպաննուած է: Անգարայի, Պոլսոյ եւ Ատանայի
մէջ եւս թրքական ոստիկանութիւնը արցունքաբեր կազ եւ ջրաշիթ մեքենաներ օգտագործած էր՝
ցրուելու համար ցուցարարները, որոնք կը բողոքէին Անգարայի ուսումնական կեդրոններէն մէկուն
տարածքին ծառեր կտրելու իշխանութիւններու ծրագիրներուն դէմ: Կիրակիէն Երկուշաբթի լուսցող
գիշեր տեղի ունեցած ցոյցերուն ընթացքին ձերբակալուած էր շուրջ տասը մարդ: Ատանայի
մէջ քանի մը տասնեակ մարդ հաւաքուած էր Աթաթուրքի անուան այգիին մէջ, դէպի քաղաքի կեդրոն
երթ կատարելու նպատակով: Երբ փողոցներէն մէկուն մէջ ոստիկանութիւնը փակած է ճամբան, ցուցարարները
պատնէշներ հաստատած են եւ սկսած ոստիկաններու վրայ քարեր նետելու: Անոնց դէմ օգտագործուած
են արցունքաբեր կազ եւ ջրաշիթ մեքենաներ՝ վիրաւորներ պատճառելով: Պոլսոյ մէջ մօտաւորապէս
հարիւր հոգի խարոյկ վառած է եւ պատնէշներով փակած երթեւեկը Իսմեթ փաշա պողոտային վրայ: Անգարայի
մէջ, ուսանողները քանի մը անգամ փորձած են դիմադրութիւն ցոյց տալ ոստիկանութեան, սակայն
վերջիններս յաջողած են ցուցարարները ցրուել: